Búgin Qyrǵyzstan prezıdenti Sadyr Japarovtyń Qazaqstanǵa resmı sapary aıasynda Qazaqstannyń mádenıet qaıratkerlerine memlekettik nagradalar tabystaý rásimi ótti, dep habarlaıdy «Adyrna» tilshisi Mádenıet jáne aqparat mınıstrliginiń baspasóz qyzmetine silteme jasap.
Saltanatty is-shara barysynda Qyrǵyzstannyń Memlekettik hatshysy Súıinbek Qasmambetov mádenıet jáne óner ókilderin memlekettik nagradalarmen marapattaý ǵasyrlarǵa ulasqan dostyqtyń, ortaq mádenıettiń, damyp kele jatqan yntymaqtastyqtyń belgisi ekenin atap ótti. Sonymen qatar mádenı-gýmanıtarlyq baılanystardyń qarqyndy damýyna baǵyttalǵan qadam retinde qarastyrylýy kerek ekenin sóz etti.
Qyrǵyz Respýblıkasy men Qazaqstan Respýblıkasy arasyndaǵy dostyq pen yntymaqtastyqty nyǵaıtýǵa qosqan eleýli úlesi úshin Qyrǵyzstan Prezıdentiniń jarlyǵymen Qazaqstan Respýblıkasynyń qoǵam qaıratkeri, mádenıettanýshy Murat Áýezov, kórnekti aqyn, dıplomat, Qazaqstan Respýblıkasynyń Qyrǵyz Respýblıkasyndaǵy burynǵy elshisi Muhtar Shahanov «Danaker» ordenimen marapattaldy. Al «Dostýk» ordeni pýblııst, ádebıettanýshy, jýrnalıst, kınosynshy, Parlament Májilisiniń burynǵy depýtaty Saýytbek Ábdirahmanovqa, memleket jáne qoǵam qaıratkeri, túrkitanýshy ǵalym Myrzataı Joldasbekovke jáne Ál-Farabı atyndaǵy Qazaq ulttyq ýnıversıtetiniń basqarma tóraǵasy, rektor Janseıt Túımebaevqa tabystaldy.
«Dańk» ordenin Halyqaralyq Túrki mádenıeti men murasy qorynyń prezıdenti Aqtoty Raıymqulova ıelendi.
Sondaı-aq «Qyrǵyz Respýblıkasynyń Halyq ártisi» qurmetti ataǵy qazaqstandyq belgili kompozıtor Altynbek Qorazbaevqa, tanymal estrada ánshisi Roza Rymbaevaǵa berildi.
Roza Rymbaeva mádenıettiń shekarasy joq ekenin atap ótti.
«1996 jyly maǵan Qyrǵyzstannyń eńbek sińirgen mádenıet qaıratkeri ataǵy berildi. 28 jyldan keıin «Qyrǵyz Respýblıkasynyń Halyq ártisi» qurmetti ataǵyn alyp otyrmyn. Bul men úshin úlken jetistik», - dedi ol.
