Mádenıet jáne aqparat mınıstrliginiń qoldaýymen batyrlargatagzym.kz portaly iske qosyldy. Bul týraly mınıstrliktiń baspasóz qyzmeti málimdedi, dep habarlaıdy “Adyrna” ulttyq portaly.
Saıt Ekinshi dúnıejúzilik soǵyqsa qatysqan qazaqstandyq ardagerler týraly málimettermen toltyrylǵan aqparattyq resýrsty usynady.
Jobanyń basty maqsaty – ár batyrdyń tarıhta laıyqty tanylýyn qamtamasyz etý.
“Túrli aqparat kózderinen aqparat jınaǵan saıt qazaqstandyqtardyń maıdandaǵy erliginiń máńgilik eskertkishi bolyp sanalady. Mádenıet jáne aqparat mınıstrligi pılottyq jobany 2023 jyly iske qosty jáne ol birden azamattyq qoǵam men eriktilerdiń úlken qyzyǵýshylyǵyna ıe boldy. Búgingi kúni portaldyń fýnkıonaly keńeıtilip, derekter tolyqqandy júıelendi. Portal bir jyldyń ishinde, ıaǵnı Uly Otan soǵysynyń 80 jyldyǵyna oraı barlyq qazaqstandyq ardager týraly derekterdi biriktiretin aqparattyq ınteraktıvti júıege deıin jetildiriledi”, delingen habarlamada.
Sondaı-aq, jobany júzege asyrýǵa úkimettik emes uıymdar men eriktiler qatysty.
Árbir qazaqstandyq soǵys ardagerleri týraly qosymsha aqparat berý arqyly bul jobaǵa óz úlesin qosa alady. Kez kelgen adam jeke otbasylyq muraǵattarda saqtalǵan qujattardy jobaǵa kóshirýge berý arqyly saıtty tolyqtyrýǵa kómektesý múmkindigine ıe bolady. Bul fotosýretter, qujattar, maıdannan kelgen hattar jáne basqa materıaldar bolýy múmkin.
