Qazaqstan Prezidentı Qasym-Jomart Toqaev Reseidıŋ Qazan qalasynda ötken «BRİKS+» sammitıne qatysty, dep habarlaidy "Adyrna" ūlttyq portaly.
Būl turaly Aqorda baspasöz qyzmetı mälımdedı. Memleket basşysy «BRİKS+» sammitıne qatysyp, plenarlyq otyrysta söz söiledı. Öz sözınde BRİKS ūiymynyŋ jahandyq yqpaldylyq ortalyǧyna ainalyp jatqanyn jäne özara tiımdı yntymaqtastyqqa ūmtylǧan köptegen elderdıŋ oǧan qyzyǧuşylyq bıldırıp otyrǧanyn atap öttı.
«BRİKS-tıŋ damuǧa degen zor äleuetı bar jäne ol ärtürlı kontinentterdıŋ memleketterın bırıktırıp, barlyq qatysuşylardyŋ igılıgı üşın ortaq mümkındıkterdı tiımdı paidalana otyryp, yntymaqtastyqty nyǧaitady. BRİKS bolaşaqty bırlesken örkendeu, özara qūrmet pen serıktestık qaǧidattaryna negızdele otyryp qūru üşın qajettı resurstar men täjıribege ie», - dedı Prezident.
Qazaqstan Prezidentınıŋ pıkırınşe, BRİKS-tıŋ köpjaqty küş-jıgerı BŪŪ qyzmetın üilesımdı tolyqtyrady. Öitkenı BŪŪ älemdık tūraqtylyq pen qauıpsızdıktı qamtamasyz etetın ämbebap qūrylym bolyp qala beredı.
«Qazaqstan BŪŪ Qauıpsızdık Keŋesın reformalaudy jäne ony Afrika, Latyn Amerikasy jäne Aziiadan jaŋa müşelermen keŋeitudı qoldaidy. Ǧalamdyq Oŋtüstık elderınıŋ dauystary beibıtşılık pen qauıpsızdık mäselelerın şeşude maŋyzdy röl atqaruy tiıs. BRİKS būl üderıste negızgı röl atqara otyryp, ortaşa derjavalar men damuşy ekonomikalardyŋ jahandyq basqaru qūrylymyndaǧy ökıldıgın küşeite alady. Qazaqstan BRİKS-tı jahandyq progrestıŋ qozǧauşy küşterınıŋ bırı retınde qarastyrady», - dep atap öttı Toqaev.
Al Resei prezidentı Vladimir Putinnıŋ BRİKS jūmysyna Qazaqstannyŋ belsendı aralasatynyna ümıtı zor.
«Qūrmettı Prezident myrza, sız BRİKS-tıŋ damuyna nazar audaryp, oǧan joǧary baǧa berdıŋız, sondai-aq, elderıŋızdegı sauda ainalymynyŋ 50%-y BRİKS elderıne tiesılı ekenın atap öttıŋız. Būl bızdıŋ özara ıs-qimylymyzdyŋ naqty maŋyzdy qūramdas bölıgı. Ärine, logistika da maŋyzdy. Bız mūny tüsınemız jäne oǧan ülken män beremız. Bız bırlesken jūmysymyzǧa belsendı qatysady dep ümıttenemız», – dedı Putin BRİKS+/autrich formatyndaǧy BRİKS sammitınıŋ qorytyndy otyrysynda.
Eske sala keteiık, Qazaqstan prezidentı BRİKS sammitıne qatysu üşın Qazanǧa saparlady. Osy qarsaŋda Qazaqstannyŋ jaqyn arada būl ūiymǧa qosyluǧa niettenbeitını aityldy. Eldegı sarapşylar būl mälımdemenı ärtürlı qabyldady.
Ūqsas jaŋalyqtar
