Almaty oblysynyŋ polisiia departamentı “Hutorskii” bandasynyŋ basşysy delıngen Hasan Qasymbaevqa qatysty būltartpau şarasy belgılengenın habarlady, dep habarlaidy “Adyrna” ūlttyq portaly.
Vedomstvonyŋ mälımetınşe, Qonaev qalasynyŋ mamandandyrylǧan tergeu soty Qasymbaevty ekı aiǧa qamauǧa alu turaly qauly şyǧarǧan. Qasymbaev 2 qaraşada ūstalǧan. Qazır ol uaqytşa ūstau izoliatorynda.
Ol densaulyqqa qasaqana auyr ziian keltırdı jäne adam ūrlady degen aiypqa ılıngen. Mūnyŋ bärı 2021 jyldyŋ mausymynda bolǧan oqiǧalar.
“Qazırgı uaqytta qylmystardyŋ barlyq män-jailaryn jan-jaqty, tolyq jäne obektivtı zertteudı qamtamasyz etu üşın tergeu äreketterınıŋ keşenı jürgızılıp jatyr. Is materialdary būltartpau şarasyn sanksiialau üşın sotqa jıberıldı”, – dep naqtylady polisiia.
Almaty oblysy polisiia departamentı taratqan aqparatqa qaraǧanda 2021 jylǧy mausymda A. esımdı azamattyŋ densaulyǧyna qasaqana auyr ziian keltırıp, sol kısını ūrlady degen küdıkpen bes azamat ūstalǧanyn habarlaǧan. Ūstalǧandardyŋ bırı – Hasan Qasymbaev. Olardy Almaty oblysynyŋ qylmystyq ıster jönındegı mamandandyrylǧan audanaralyq sot sottap, qazırgı uaqytta qylmyskerler jazasyn bas bostandyǧynan aiyru oryndarynda ötep jatyr.
Hasan Qasymbaevtyŋ esımı Talǧardaǧy 16 jastaǧy Şerzattyŋ qazasynan keiın qaladaǧy būzaqylyq, qylmystyq ısterdıŋ artynda tūrǧan basty adam, “Hutor” ŪQT-nyŋ jetekşısı retınde aityla bastady. Alaida resmi organdar mūny terıstep, Talǧarda eşqandai qylmystyq top joq, atalǧan oqiǧalar boiynşa küdıktılerdıŋ Hasan Qasymbaevpen bailanysy anyqtalmady degen. Hasan Qasymbaev ta köpşılıkke ündeu joldap, özınıŋ qandaida bır qylmystyq ärekettermen bailanysyn joqqa şyǧarǧan. “Hasandy” qorǧap ündeu jasaǧan auyldastary ony qaiyrymdy, auylǧa, mūqtaj adamdarǧa belsene qol üşın beretın adam retınde sipattaǧan. Juyrda qoǧamdyq rezonansqa ainalǧan ısten keiın Hasan Qasymbaevtyŋ aǧasy Aslan Qasymbaev Talǧar audany äkımı apparatynyŋ basşysy qyzmetınen bosatylǧan.
