Prezident Djo Baiden äkımşılıgı Ukrainaǧa Resei aumaǧyn ATACMS zymyranymen atqylauǧa rūqsat berdı. Būl turaly 17 qaraşada The New York Times jazdy, dep habarlaidy «Adyrna» tılşısı.
Şeteldık BAQ-tyŋ mälımetınşe, taktikalyq qaru bastapqyda Kursk aimaǧyndaǧy Resei jäne Soltüstık Koreia äskerlerıne qarsy qoldanyluy mümkın. Degenmen, şeneunıkter Baiden Ukraina qaruly küşterıne qarudy basqa jerde qoldanuǧa rūqsat beruı mümkın dep sanaidy.
«Ukraina būl zymyrandardy Resei men Soltüstık Koreia äskerlerınıŋ şoǧyrlanǧan aimaqtaryna, äskeri tehnikasyna, logistikalyq tüiınderıne, oq-därı qoimalaryna jäne jabdyqtau jelılerıne soqqy jasau üşın paidalana alady. Būl Resei men Soltüstık Koreia küşterınıŋ şabuylyn bäseŋdetuge kömektesedı»,—delıngen aqparatta.
Al Reuters derekközderı Kiev amerikalyq qaruymen aldaǧy sanauly künde şabuyl jasamaq degen aqparat taratty.
Aq üi äzırge būl mälımetterge eşqandai mälımdeme jasaǧan joq.
Aita keteiık, ATACMS ballistikalyq zymyrandary 300 şaqyrymǧa deiıngı qaşyqtyqtaǧy nysandardy däl közdeuge qabılettı.
Būǧan deiın jaŋa sailanǧan prezident Donald Tramp Baidendı Ukrainaǧa körsetken qoldauy üşın aiyptaǧan edı.
