Qazaqstandyqtarǧa berıletın 10 sottyq tegın jer endı tek infraqūrylym jürgızılgen telımderden ǧana berıledı, dep habarlaidy “Adyrna” ūlttyq portaly Ulysmedia.kz saityna sıltep.
Aqparatqa säikes, su men jaryq tartylmaǧan uchaskege üi saluǧa rūqsat joq.
Auyl şaruaşylyǧy ministrlıgınıŋ habarlauynşa, būrynnan kezekte tūrǧan azamattarǧa qaitadan ötınış berudıŋ qajetı joq, olardyŋ kezegı saqtalady. Tızım jergılıktı atqaruşy organnyŋ avtomattandyrylǧan jūmys ornynda, esepke qoiyluyna qarai qalyptastyrylady.
Erejege säikes jer telımı ötınış arnaiy esepke qoiylǧannan keiın ǧana berıledı. Al arnaiy eseptı jergılıktı atqaruşy organdar jürgızedı. Eger üi salynbasa jer telımı memleket menşıgıne qaitarylady. Būl özgerıster azamattarǧa jer telımın ädıl ärı maqsatty türde ülesteru üşın jasalyp otyrǧanyn aita ketken abzal.
Būryn mūndai talap bolmaǧan. Sol sebeptı el azamattary özı qalaǧan aimaqtan jer aluǧa ötınış bergen jäne ondai adamdardyŋ sany 4 millionnan asady. Endı ötınış berılgen aimaqta infraqūrylym jelısı jürgızılmese, kezek jylji beredı.
