Taldyqorǵanda gaz-ballon jabdyǵy bar avtokólik jarylyp, turǵyn úıdi qıratty. Bul týraly oqıǵa ornynan túsirilgen vıdeo jelide tarady, dep habarlaıdy “Adyrna” ulttyq portaly.
"Týystarymyzdyń kóligi jarylyp ketti. Endi jaqyndarymyz qysta baspanasyz qaldy. Óte qıyn jaǵdaı. Endi olarǵa jóndeý jumystaryn jasap, úıdi qalpyna keltirý kerek", – deıdi vıdeo avtory.
Jetisý oblysy tótenshe jaǵdaılar departamentiniń málimetinshe, 4 naýryzda Taldyqorǵannyń Erkin aýylynda garajda turǵan kóliktiń gaz jabdyǵy jarylǵan.
"Habarlama 07:06-da tústi, oqıǵa ornyna dereý tótenshe jaǵdaılar departamentiniń qutqarýshylary jiberildi: 20 adam, 6 tehnıka. Keıin 50 sharshy metrlik sharýashylyq qurylys nysandary jartylaı qırady. Órt bolmaǵan", – dep málimdedi tótenshe jaǵdaılar departamenti.
Resmı derekterge sáıkes, bir adamnyń zardap shekken. Ol aýyr turaqty jaǵdaıda aýrýhanaǵa jatqyzyldy. Oqıǵanyń mán-jaıy anyqtalyp jatyr.
