Byltyr jaŋa jyldy toilauǧa Astana qalasy 836 mln teŋge bölıptı. Almatylyq salyq töleuşılerdıŋ 800 mln teŋgesı qalany bezendıruge, jyltyraqtar men ertegı keiıpkerlerınıŋ müsının ornatuǧa jūmsalǧan. Şymkent äkımdıgı şyrşa qūru, otşaşu dep 80 million teŋgenı şaşyp jıbergen. Özge oblystar da jaŋajyldyq toi-tomalaqqa qyruar qarjy böldı.
Al endı myna qyzyqty qaraŋyz! Qazaqşa jyl basy sanalatyn Nauryz meiramyna biudjetten bır tiyn bölınbegen. Tek 2024 jyly Almaty äkımdıgı merekelık şaralarǧa bailanysty bannerler jasauǧa jäne ornalastyruǧa dep 71 mln teŋgege tender jariialaǧan. Tıptı Qarjy ministrı Mädi Täkievtıŋ özı Nauryzdy toilauǧa respublikalyq biudjetten bır tiyn qarastyrylmaǧan deptı byltyr.
Demek, Nauryz merekesı älı de memlekettık deŋgeide toilanyp jatqan joq. Kei öŋırlerde tıptı jetım qyzdyŋ toiyndai jūpyny ötedı. Grigorian küntüzbesındegı jaŋa jylǧa milliondap aqşa böletın äkımder, kün men tün teŋeler tūsta tarylyp qalatyny nes?
Äiteuır byltyrdan berı "Nauryznama" tūjyrymdamasy bekıtılıp, Ūlystyŋ Ūly toǧyz kün toilanatyn boldy. Bıraq älı de nauqanşyldyqqa salynyp jatyrmyz. Mäselen, bügın biudjetnikter men mem. qyzmetkerler jappai oiuly şapandaryn jamylyp alypty. Är mekememe ūlttyq kiımmen rolik tüsırıp, älem jelıge taratsyn degen tapsyrma da bolǧan siiaqty. Sondyqtan Almatynyŋ Baraholkasyndaǧy "qyrǧyz riadta" qyrǧyn sauda bolyp jatyr bügın. Al, erteŋnen bastap europalyq ülgımen Qytaida tıgılgen şüberekterımızdı kiıp alamyz. Köboiauşylyq äiteuır...
