Özbekstanda Parlamentaralyq Odaq Assambleiasynyŋ mereitoilyq otyrysy öttı. Forumǧa qatysuşylar parlamentterdıŋ äleumettık damu men äleumettık ädıldıktı qamtamasyz etudegı rölın talqylady. Qazaqstan Parlamentınıŋ delegasiiasyn Mäjılıs töraǧasy Erlan Qoşanov bastap bardy.
Mäjılıs spikerı baiandamasynda atap ötkendei, forumnyŋ ǧasyrlar boiy halyqtar men mädenietterdı toǧystyrǧan Ūly Jıbek jolynyŋ boiynda ūiymdastyryluynyŋ simvoldyq mänı zor. Ol Parlamentaralyq Odaqtyŋ 150-şı Assambleiasy taqyrybynyŋ özektılıgıne toqtala otyryp, jaŋa jahandyq syn-qaterler jaǧdaiynda BŪŪ Bas hatşysy Antoniu Guterriş ūsynǧan jaŋa qoǧamdyq şart ideiasynyŋ maŋyzdylyǧy arta tüskenıne män berdı. Erlan Qoşanov Qazaqstan onyŋ ideiasynyŋ ädılettılık pen yntymaqqa negızdelgen basty qaǧidattaryn tolyq qoldaitynyn, al parlamentter onyŋ jüzege asyryluynda halyq atynan ökıldık etetın institut retınde basty röl atqara alady dep esepteidı.
«Ädılettılık Prezidentımız Qasym-Jomart Toqaevtyŋ saiasi baǧdarynyŋ ideialyq negızı sanalady. Onyŋ köşbasşylyǧymen Ädılettı Qazaqstandy qūruǧa baǧyttalǧan jüielı saiasi jäne ekonomikalyq reformalar ıske asyryluda. Būl qoǧamnyŋ saiasatqa aralasu mümkındıgın keŋeitıp, äleumettık teŋsızdıktı azaitty. İnkliuziiany damytuǧa, densaulyq saqtau men bılımnıŋ qoljetımdı boluyna, ūlttyq bailyqtyŋ ädılettı bölınuıne airyqşa nazar audaryluda. Mūnyŋ bärı Parlament qabyldap jatqan zaŋdarda körınıs tauyp otyr», – dedı Erlan Qoşanov.
Mäjılıs töraǧasy soŋǧy otyz jyl ışınde qarjy sektorynyŋ naqty öndırıstı yǧystyryp kele jatqanyn köptegen halyqaralyq sarapşylar atap körsetıp jatqanyna toqtaldy. Būl memlekettıŋ äleumettık rölınıŋ tömendeuıne jäne jūmysşylardyŋ qūqyqtarynyŋ saqtaluyna kerı äserın tigızdı. Qazaqstanda, kerısınşe, barlyq azamatqa laiyqty eŋbek jaǧdaiyn jasap, käsıbi ösudıŋ teŋ mümkındıkterın qamtamasyz etuge erekşe köŋıl bölınedı. Memleket basşysy 2025 jyldy Jūmysşy mamandyqtar jyly dep jariialady.
Qazaqstan ışkı reformalardy belsendı halyqaralyq yntymaqtastyqpen ūştastyra otyryp sättı jüzege asyryp keledı. Bızdıŋ el Ortalyq Aziia men Auǧanstan elderı üşın Ornyqty damu maqsattary boiynşa BŪŪ-nyŋ öŋırlık ortalyǧyn Almaty qalasynda qūru bastamasyn ūsynǧan bolatyn. Osyǧan orai Mäjılıs töraǧasy BŪŪ Bas Assambleiasynyŋ tiıstı qararyn bırauyzdan maqūldaǧany üşın atalǧan ūiymǧa müşe barlyq elge şynaiy rizaşylyǧyn bıldırdı.
Ekınşı künı älemnıŋ joǧary parlamenttık delegasiialaryna Özbekstan Prezidentı Şavkat Mirziioev qūttyqtau sözın arnady. Ol beibıtşılık, demokratiia jäne ornyqty damu ideialaryn älem boiynşa ılgerıletuge qosqan ülesı üşın Parlamentaralyq Odaqtyŋ rölın erekşe atap öttı.
Özbekstan basşysy Ortalyq Aziia elderı parlamentterınıŋ spikerlerın qabyldap, Assambleiaǧa qatysqandary üşın alǧys aitty jäne öŋırdegı parlamentter arasyndaǧy özara ıs-qimyldy küşeitu jönındegı basym baǧyttardy talqylady.
Forum aiasynda Erlan Qoşanov şeteldık ärıptesterımen bırqatar ekı jaqty kezdesu ötkızdı.
Ol Özbekstan Respublikasynyŋ Olii Mäjılısı Zaŋ şyǧaru palatasynyŋ spikerı Nuriddin İsmoilovpen, Bahrein Koroldıgınıŋ Ökılder keŋesınıŋ spikerı Ahmed Almusalammen, Marokko Koroldıgı Parlamentınıŋ Keŋesşıler palatasynyŋ töraǧasy Mohammed Uld Erraşidpen, Ündıstan Parlamentınıŋ Halyq palatasynyŋ töraǧasy Om Birlamen parlamentaralyq yntymaqtastyqty arttyru mäselelerın talqylady. Taraptar parlamentaralyq diplomatiia aiasyndaǧy özara ıs-ärekettı nyǧaitu, zaŋnama salasynda täjıribe almasu joldaryn ortaǧa saldy.
Sondai-aq Mäjılıs spikerı forum aiasynda Resei, Äzerbaijan, Vetnam, Gruziia, Türkiia jäne Qyrǧyzstan parlamentterınıŋ töraǧalarymen yntymaqtastyqty tereŋdetu mäselelerı boiynşa pıkır almasty.
Taşkentte ötken ıs-şaraǧa älemnıŋ şamamen 140-tan astam elınen delegattar qatysty. Qazaqstan deputattary negızgı sessiiadan bölek, beibıtşılık jäne qauıpsızdık, tūraqty damu mäselelerı boiynşa komitet otyrystaryna, äielder parlamentariilerınıŋ forumyna, «Euraziia» geosaiasi tobynyŋ otyrysyna qatysty.
Qazaqstan Parlamentı Mäjılısınıŋ deputaty Aigül Kūspan basqaratyn Beibıtşılık jäne halyqaralyq qauıpsızdık mäselelerı jönındegı tūraqty komitettıŋ otyrysynda «Palestinada ekı memlekettınıŋ qatar ömır süruı turaly şeşımdı ılgerıletudegı parlamentterdıŋ rölı» atty qarar jobasy qaraldy.
Parlamentaralyq Odaq - 1889 jyly qūrylǧan eŋ ırı halyqaralyq parlamenttık ūiym. Oǧan 180 eldıŋ parlamentterı kıredı. Qazaqstan 1993 jyldan bastap Parlamentaralyq Odaq Assambleiasyna müşe.
Parlamentaralyq Odaq Assambleiasy parlamenttık diplomatiiaǧa yqpal etedı jäne parlamentter men parlamentşılerge bükıl älemde beibıt saiasatty, demokratiiany jäne tūraqty damudy ılgerıletu ökılettıkterın beredı.
