7 säuırde Şeşenstannyŋ Achhoi-Martan qalasynda belgısız jasöspırım patruldık qyzmet poliseilerıne pyşaqpen şabuyl jasady. Bır polisei auruhanada köz jūmdy, taǧy ekeuı jaralandy. Kelesı künı şabuyl jasaǧan dep aiyptalǧan jasöspırımnıŋ mäiıtı qala ortalyǧyndaǧy alaŋǧa qoiyldy, dep habarlaidy "Adyrna" ūlttyq portaly VVS-ge sıltep.
Memlekettık mekemelerdıŋ qyzmetkerlerı men mektep oquşylary mitingke qatysuǧa mäjbürlendı.
Kuägerlerdıŋ aituynşa, mäiıt qanǧa boialǧan qapqa oralǧan küide alaŋǧa jetkızılıp, köpşılıktıŋ közınşe aşylǧan. Äielderdıŋ jylaǧany, keibırınıŋ esınen tanyp qalǧany turaly habarlandy. Şara barysynda jergılıktı äkım men şariǧat sotynyŋ ökılı söz söilegen.
Oppozisiialyq Telegram-arnalar taratqan videolarda mäiıt ainalasynda jinalǧan halyqtyŋ abyrjuly sätterı beinelengen. Mäiıt keiın basqa orynǧa auystyrylyp, sol jerde de bırneşe uaqyt jatqany baiqalady.
Būl jaǧdai qoǧamda ülken rezonans tudyrdy. Resei prezidentı janyndaǧy Adam qūqyqtary jönındegı keŋestıŋ müşesı Eva Merkacheva mūny "ortaǧasyrlyq qatygezdık" dep atap, mūndai äreketterdıŋ eşqandai qūqyq normasyna sai kelmeitının mälımdedı.
Respublika basşysy Ramzan Qadyrov şabuyldan keiın şūǧyl jiyn ötkızıp, şabuyldauşynyŋ tuystaryn respublikadan quuǧa būiryq berdı. Ol olardyŋ mülkın tärkılep, satudy jäne būl qarjyny mūqtaj jandarǧa böludı ūsyndy. Eger tuystary ūrpaǧyn toqtatpasa, aldaǧy bır ai ışınde alys tuystarynyŋ da mülkı tärkılenıp, respublikadan şyǧarylady dedı.
Qadyrov şabuyl jasaǧan jasöspırımnıŋ Mäskeuden Oraza ait merekesıne kelgenın mälımdedı. Onyŋ aituynşa, şabuyl şetelden – Ukraina men Türkiiadan basqarylǧan boluy mümkın.
Jurnalist Zakir Magomedov būl jaǧdai Şeşenstanda būrynnan qoldanylyp kele jatqan ūjymdyq jaza täjıribesınıŋ jalǧasy ekenın aitady. Bıraq mäiıttı köpşılıkke körsetu – būryn-soŋdy bolmaǧan äreket ekenın atap öttı. "Būl – ürei tuǧyzu täsılı, özgelerge sabaq bolsyn degen eskertu", – deidı ol.
Qazırgı uaqytta jasöspırımnıŋ tuystary qūqyq qorǧau organdarynda ūstalyp otyr. Keibır mälımetterge qaraǧanda, olarǧa soǧysta qyzmet etu arqyly kınäsın "öteu" ūsynylǧan.
Kreml būl jaǧdaiǧa naqty tüsınıkteme bermei, aqparattyŋ oppozisiialyq arnalardan şyqqanyn alǧa tartty.
