Şymkent qalasynda tarihi-mädeni keşen "Şymqala" qarausyz qalyp, tozyp barady. Būl nysan nebärı tört jyl būryn saltanatty türde aşylyp, onyŋ qūrylysyna memleketten şamamen 3 milliard teŋge bölıngen bolatyn. Alaida qazırgı jaǧdaiy turister men qala tūrǧyndarynyŋ köŋılın qynjyltyp otyr, dep habarlaidy "Adyrna" ūlttyq portaly KTK arnasyna sılteme jasap habarlady.
Keşen atauynyŋ özı – "Şymqala" – köne qala ornyna salynǧanyn meŋzeidı. Arheologtar būl jerde ejelgı qūrylys qaldyqtaryn tapqan. Alaida zamanaui qūrylys sapasy köŋıl könşıtpeidı. Qabyrǧalardan plitkalar tüsıp, alleialar aramşöpke tolyp ketken, al syrtyna jaǧylǧan sändık qabattar ketılıp, keşen jüdeu küige tüsken.
Keşenge keluşılerden 1000 teŋge kölemınde kıru aqysy alynady. Bıraq ol qarjy da infraqūrylymdy qalpyna keltıruge baǧyttalmai otyr. Qazırgı taŋda etnoauyl tolyq jabylyp, būrynǧy iurtalar men aǧaş ätkenşekter şetke jinap tastalǧan küide şaŋ basyp jatyr.
Keşen direktory Jandos Qūrbannyŋ aituynşa, basty mäsele — qūjattardyŋ joqtyǧynda.
"Keşennıŋ jalpy audany 4,5 gektardy qūraidy. Bıraq bızde tek jerge qatysty memlekettık akt qana bar. Qabyldau aktısı jasalmaǧan boluy mümkın, sondyqtan jaŋa salynǧan jäne qaita qalpyna keltırılgen nysandardyŋ eşqaisysynda qūjat joq", — dedı ol.
Äkımdık ökılderı biyl keşenge qatysty qūjattardy retke keltırudı josparlap otyrǧandaryn mälımdedı. Alaida qūjattarsyz kürdelı jöndeu jūmystaryn bastau mümkın emes ekenın alǧa tartty.
Aita keteiık, būl jaǧdai jalǧyz emes. Būǧan deiın Türkıstan oblysyndaǧy tarihi nysan — Aqbikeş mūnarasy da restavrasiiadan keiın qūlap tüsken bolatyn.
