İrakta bilıkke qarsy aksiialar kezınde bır aptaǧa jetpeitın uaqyt ışınde 104 adam qaza tauyp, 6107 adam jaralanǧan. Būl turaly İrak ışkı ıster ministrlıgı habarlady. Mekemenıŋ baspasöz hatşysy Saad Maannyŋ aituynşa, zardap şekkenderdıŋ 1200-ı – qauıpsızdık küşterınıŋ qyzmetkerlerı.
Maan qaza tapqandar arasynda qauıpsızdık küşterınıŋ segız qyzmetkerı bar dep aitty. IIM baspasöz hatşysynyŋ mälımetınşe, narazylar 51 qoǧamdyq ǧimarat pen saiasi partiialardyŋ segız ştab-päterın örtegen.
Qazannyŋ 1-ı künı bastalǧan jastar narazylyǧyna mūnaiǧa bai memlekettegı jemqorlyq, jūmyssyzdyq pen qoǧamdyq qyzmet sapasynyŋ naşarlyǧy sebep boldy. El astanasy Baǧdat pen taǧy bırneşe qalada qarsylyq aksiiasyna şyqqandar eldı jailaǧan jemqorlyqty joiyp, ükımettı auystyrudy talap ettı. Narazylyq şerulerınıŋ soŋy qaqtyǧystarǧa ūlasyp, qantögıske äkelgen.
"Azattyq" radiosy
