Jan-jaqtan sūratyp jürıp, ötkendegı videonyŋ qalǧan üzıkterı de qolǧa tüsıp jatyr.
Şaşylǧan ainanyŋ synyǧyndai basqalary tabylyp jatsa, ony da şyǧararmyn, būiyrtsa.
Allanyŋ ämırı solai, qazır älemdı aqparat bilep tūr. Bilegenı sondai düniejüzılık saiasat pen qaraşa üiıŋnıŋ qarym-qatynasyna deiın degenın jasap-aq jatyr. Bıreudı jaqsy körıp, jek köruıŋe deiın jürektıŋ qalauy emes, jelınıŋ qalauy qattyraq äser etedı.
Ony ne üşın aityp jatyrmyn. Bırneşe kün būryn taraǧan menıŋ video-kesındılerım jaily...
Tyŋdaǧan jūrt ärtürlı pıkır bıldırdı. Sonyŋ ışınde dındar, ūstaz, oqyǧan bauyrlarym da bar. Üiırıp soqqan aqparat dauyly, Qairat Joldybaiūly sekıldı biiazy bauyrymdy da ortaǧa alyp şyqty. Aşuǧa mıngızıp, aşyna söiletıp, bıraz artyq-kem söz jazǧyzdy. Qairat kım!
Ol - men namaz oqityn meşıttıŋ imamy. Men onyŋ jūma saiyn artynda tūrǧan jamaǧatynyŋ bırımın. Menıŋ qūlaǧymda baisaldy imamnyŋ qoŋyr dausy, köz aldymda jūmsaq jymiǧan beinesı ǧana...
Aqparat-fitnasynyŋ qiyndyǧy sondai, meşıtte barşamyzǧa sabyrdy uaǧyzdap, salqynqandylyqty nasixattap jürgen imam bauyrymyzdyŋ özın emosiiaǧa ūryndyryp, bebeuletıp jıberdı.
Rasynda, körgen videoŋda, Mekkenıŋ jaǧdaiyn mysalǧa keltıre otyryp, "ol jerde jambasqa tepken", "älem ǧūlamalarynyŋ bärı pätuä bergen", "polisiia, sen prikazdy orynda!" dep jatsa, imam tügılı, müptidıŋ özı selk ete qaluy mümkın ǧoi...
Ol jerde senıŋ dıni maman emes, qoǧam qairatkerı, patriottyqty tu etken aqyn retınde aqtarylyp jatqanyŋdy kım ūqsyn?!
Qoldan qiystyryp, taŋdap jasalyp, tarqalǧan videonyŋ da negızgı maqsaty sol edı, tarqatuşylardyŋ armany da sol edı. Oidaǧysy oryndaldy.
Qoǧam qaq bölındı. Tüsıne qaraityndar men tüsıngısı kelmeitınder bop ekıge bölındı. Bıreu Mūxamedjanǧa sengısı keledı, bıreu Qairatty qoldap bäiek boluda.
Aqparattyq arandatu men ideologiialyq ırıtkı degen osy. Rasynda osy videony men özım taratyp, nemese, osyǧan ūqsas ospadar nasixatty jalpyǧa nemese qūzyrly oryndarǧa aityp jatsam, qalai aiyptalsam da armanym bolmas edı. Aşy aqparat yşqyntyp aldyǧa şyǧarmasa, imam bauyrymyz "ateistpın" dep jürgen abliazovpen, dın men dın adamdaryn künde mazaq qyp jürgen tanymal blogerlermen bır sapta tūryp,
öz jamaǧatynyŋ "aiybyn" aşyp, öz dosynyŋ jaǧasynan tartar ma edı? Ärine, öitpes edı.
Aqparat aşyndyrmasa, jekege şyǧyp, jönın sūrar edı ǧoi.
"Būl ne, bır jaqty nasixat?" dep, aqiqatyn bıler edı ǧoi. "Raxmannyŋ qūldary" degen bır chatta otyrmyz, jahanǧa jariia aitpas būryn, jaqyn jerden jauabyn op-oŋai alar edı ǧoi.
Aqparattyq killerlerdıŋ kırısken jerın qarasaŋyzşy.
Äitpese, ekı mūsylmannyŋ egesıp jatqany, eşkımge paida emes ekenın, būl kısıden artyq bıler, Qazaqstan ruxaniiatynda kım bar edı?
Menıŋ aitpaǧym, aqparat däuırı degen qazır osyndai.
Jäi adam tügılı, Qūdai ılımın igergen, är qylyǧy özgege ülgı bolatyn, är sözı üşın qiamette sūralatynyn bıletın, dındar-taqualardyŋ özın, yzbarly beinege, yzaqor keiıpke tüsıredı.
Arnaiy jasalǧan videoǧa ilanyp qalmasa, "dın süikımsız körınetın boldy-au" degen janaşyrlyǧymen janūşyra asyǧys post jazbas edı ǧoi. Äitpese, jurnalistke bergen är sūqbatyn jeke diktofonyna qosa jazatyn qūrmettı Qairat bauyrym, bıreuden kelgen aqparattyŋ artyn tekseru kerek ekenın jaqsy bıledı ǧoi.
Şäi desken jerımız joq, ol üidegı kelınnıŋ qolynan men as ışıp, bızdıŋ üiden Qairekeŋ däm tatyp jürgen künder keşe ǧana emes pe edı...
Dıni basqarma men komitet otyrystarynda maŋyzdy mäselelerdı bırge talqylap, qatar otyrǧan sätterımız qalai esten şyqsyn...
Naizaǧaidai aqparattyŋ jarq ete qalǧandaǧy jaman jerı de osynda.
Aldy-artyŋdy oilatpai, ūrandatyp jıberedı.
Äitpese kez-kelgen aqparattyŋ artyn kütıp, syryn tekserudı bızge talmai üiretken imam bauyrlarymyzdyŋ özı emes pe edı?!
Qazırgı uaqytta, aldy-artymyzdy oraǧan aqparat, ata-anamyzdan äserlı, jūbaiymyzdan da jaqyn bop bara jatyr.
Qoǧam bop sottap jatqan pedofildı boqtamauyz mümkın, bıraq, aqparattyŋ äserınen keşe ǧana täntı bop otyrǧan tūlǧany bügın oilanbastan qarǧap otyruymyz mümkın.
Aqparat alaŋy - qyp-qyzyl soǧys maidany. Aqparat arqyly ideologiialyq soǧys jürıp jatyr.
Myqty bolsaŋ jaqsylyǧyn igeresıŋ, älsız bolsaŋ, jamandyǧyna ilenesıŋ. Texnologiia damyp, aqparat alu jyldamdaǧannyŋ arqasynda 100 jyl būryn bır kısınıŋ 40 jylda tırnektep jinaityn bılımın, qazır 4 jylda igeretın mümkınşılıkke ie boldyq. İnternet arqyly sauda jyldamdap, bailanys üdedı...
Kerısınşe, aqparattyq jarnamanyŋ äserınen ǧylym egelerı men maitalman eŋbek adamdary tasada qalyp, şou biznes pen toi biznes ökılderı qoǧamnyŋ aldyna şyqty. Mūǧalımnıŋ ailyǧy men tamadanyŋ tabysy on ese aiyrmaşylyqqa jettı. Matematik Jūmadıldaevtyŋ bır därısın tyŋdamaǧan ūrpaq, töbeleskış Habibtıŋ är jekpe-jegın jatqa bıletın jaǧdaiǧa jettı. Jarnamanyŋ jetekteuımen jyrtyq şalbardy quana kiıp, omyrauyn japqanǧa oqyrana qaraityn boldyq. Kinoteatrdan şyqqan saiyn qol ūstasqan erkekterdı baiqamaǧan bop, süiısken qyzdarǧa söileuden qaldyq.
Äleumettık jelını äuliedei köremız. Künıne jüzdegen aqparat keledı. Jüregıŋdı jüz jaqqa süireidı. Keibırı eskırgen aqparat, köbısı ötırık bop şyǧady. Aqyrynda, syǧylǧan jürek, şarşaǧan mi, tozǧan jüike üşın kım jauap beredı? Eşkım de...
Sebebı, zaman sondai, uaqyt ürdısı osylai...
Aman qalu üşın, jürekte ädıl tarazy bolmasa, ruxani süzgı, imani imunitet bolmasa, şarşaǧanymyz şarşaǧan, şatasqanymyz şatasqan...
Mūhamedjan Tazabektıŋ Feizbuk paraqşasynan
