Aqtöbe oblysynda sot Jūbanov atyndaǧy auyldyq okrugtıŋ äkımı Läzzat Berdıbaevaǧa qatysty ıstı uaqytşa toqtatty. Būl turaly QazAqparat agenttıgı jariialady, dep habarlaidy “Adyrna”.
Aita ketsek, Läzzat Berdıbaevanyŋ dalada gül ūstaǧan suretı qoǧamda ülken rezonans tudyrǧan bolatyn.
Sottyŋ aituynşa, Berdıbaeva ūstaǧan qyzǧaldaqtyŋ naqty türın anyqtau qajet. Sol sebeptı arnaiy saraptama taǧaiyndalǧan.
Sudianyŋ aituynşa, Läzzat Berdıbaevaǧa Mūǧaljar audanynyŋ äkımınen jaǧymdy mınezdeme kelıp tüsken. Onda Berdıbaevanyŋ eşqandai tärtıptık jaza almaǧany, jūmysyn jaqsy atqaratyny jäne halyqpen sypaiy qarym-qatynasta ekenı aitylǧan.
"Äkımşılık ıstı qarau barysynda sot kelesıdei şeşımge keldı: Läzzat Berdıbaevaǧa qatysty toltyrylǧan hattamada körsetılgen negızderdı jan-jaqty ärı obektivtı türde zertteu üşın, Äkımşılık qūqyq būzuşylyq turaly kodekstıŋ 757, 777, 824 jäne 829-baptaryna säikes, sot öz bastamasymen qyzǧaldaqtyŋ türın anyqtau maqsatynda arnaiy saraptama taǧaiyndau turaly qauly şyǧardy. Osyǧan bailanysty äkımşılık ıstı qarau saraptama aiaqtalǧanǧa deiın toqtatylady", – dedı sudia.
Aldyŋǧy otyrysta Läzzat Berdıbaeva gülder jūlynǧan jerde tyiym salynǧan belgıler bolmaǧanyn, al aumaqtyŋ jaiylymdyq jer ekenın aitty. Sonymen qatar, ıstıŋ materialdarynda eşqandai saraptamalyq qorytyndy men gülderdıŋ sirek nemese qorǧalatyn tür ekenın däleldeitın aiǧaq joq ekenın jetkızdı. Auyl äkımı gülderdı jūlmau turaly qyzdaryn aldyn ala eskertkenın de atap öttı.
Aqtöbe oblystyq orman şaruaşylyǧy jäne januarlar düniesı aumaqtyq inspeksiiasynyŋ bas mamany Artur Kantarbaevtyŋ aituynşa, qyzǧaldaqtyŋ naqty türın tek ǧylymi-zertteu instituty anyqtai alady. Onyŋ mälımetınşe, būl öŋırde üş türlı qyzǧaldaq ösedı, sonyŋ ışınde Şrenk qyzǧaldaǧy da bar.
Būǧan deiın polisiia Läzzat Berdıbaevaǧa qatysty kämeletke tolmaǧan balany tärbieleu jäne baǧyp-qaǧu mındetterın oryndamaǧany üşın äkımşılık hattama toltyrylǧanyn habarlaǧan.
