Özbekstan Resei ministrınıŋ Europalyq odaq saiasatyn synaǧanynan keiın mälımdeme jasady, dep habarlaidy “Adyrna” ūlttyq portaly.
Özbekstan prezidentınıŋ syrtqy saiasat jönındegı arnaiy ökılı Kamilovtyŋ aituynşa, bügınde Ortalyq Aziia aimaǧy halyqaralyq qauymdastyq aldynda derbes ärı bırtūtas subekt retınde tanylyp otyr. Onyŋ sözınşe, “Ortalyq Aziia +” formatyndaǧy halyqaralyq ärıptestık alaŋdarynyŋ sany onnan asyp ketken. Sonyŋ bırı – juyrda Samarqanda ötken “Europalyq odaq + Ortalyq Aziia” sammitı. Sammit qorytyndysy boiynşa strategiialyq serıktestık turaly deklarasiia qabyldanǧan.
“Bızdıŋ saiasat – pragmatikalyq. EO-da 28 memleket, jalpy ışkı önımı 19 trln dollardan asady. Mūndai mümkındıktı paidalanu – bız üşın de tiımdı. Sondyqtan būl bıreuge ūnai ma, ūnamai ma – bız bärıbır yntymaqtastyqty jalǧastyramyz”, – dedı Kamilov.
Būl mälımdeme Resei Syrtqy ıster ministrı Sergei Lavrovtyŋ EO saiasatyn synaǧanynan keiın jasaldy.
Özbekstannyŋ ökılı Ortalyq Aziiany özara tatulyq pen tatu körşılık arqyly damyp jatqan öŋır retınde sipattap, basqa aimaqtarǧa ülgı bola alatynyn aitty. Özbekstan prezidentı Şavkat Mirzieevtıŋ de BŪŪ Bas Assambleiasynyŋ 78-sessiiasynda osy ideiany kötergenın eske saldy.
Aita keteiık, 4 säuır künı Samarqanda alǧaş ret “Ortalyq Aziia – EO” sammitı öttı. Onda taraptar strategiialyq ärıptestıkke köşuge kelısım jasasqan. Europalyq komissiia tört basym baǧytqa, sonyŋ ışınde Transkaspii kölık dälızın damytuǧa 10 mlrd euro baǧyttaudy qosa alǧanda, barlyǧy 12 mlrd euro kölemınde qarjylai kömek körsetetının mälımdedı.
Arada ekı apta ötkende Reseidıŋ syrtqy ıster ministrı Sergei Lavrov Samarqanǧa resmi saparmen kelıp, EO-nyŋ aimaqqa qatysty saiasatyn synady. Ol Batys elderı antireseilık kün tärtıbın ılgerıletıp jatyr dep atap öttı.
“Keibır ärıptester, äsırese Batys elderı, özara tiımdı jobalardy ūsynǧannan görı, Ortalyq Aziia elderınıŋ ışkı qūrylymyna enuge baǧyttalǧan baǧdarlamalarǧa qarjy bölu arqyly öz müddelerın alǧa tartuǧa tyrysuda”, – dedı Lavrov.
Resei taraby öŋırdegı serıktestık prosesterınıŋ saiasilanuyna jäne ideologiialyq üstemdık ornatuǧa qarsy ekenın mälımdegen bolatyn.
Ūqsas jaŋalyqtar
