Dempartiia qūrudy közdeitın toptyŋ jiynyna kelgen äielder qoldaryna plakat ūstap tūr. Nūr-Sūltan, 24 qaraşa 2019 jyl.
"Atajūrt erıktılerı" ūiymynyŋ Nūr-Sūltandaǧy keŋsesındegı jiynda partiia qūrudy közdeitın bastamaşyl top astanada ştab qūryp, partiia baǧdarlamasyn tanystyruy tiıs edı. Jiynǧa partiia qūru ideiasyn kötergen belsendı Janbolat Mamai Almatydan Skype arqyly qatysty (Mamai bilıktı synauşy şetelde tūratyn Mūhtar Äbliazovtan "aqşa alyp, gazet şyǧardy" dep üş jylǧa bas bostandyǧy şektelgen. Onyŋ probasiialyq merzımı aiaqtalmaǧandyqtan Almatydan basqa qalaǧa şyǧa almaidy).
Bastamaşyl top partiia qūrudaǧy maqsattaryn aityp jatqanda özın “jalǧyzbasty ana ärı därıger Janat Aşirova Qozybaevna” dep tanystyrǧan äiel "qanşa jiyn ötkızdıŋızder, demokratiia deisızder, osyǧan deiın ne şeştıŋızder? Mäsele şeşıldı me? Aitasyzdar da qoiasyzdar. Halyqty aldamaŋdar, partiia qajet emes" dep şu şyǧardy. Onyŋ sözın janynda otyrǧan taǧy ekı äiel de qoldap, "Janbolat Mamai partiia qūramyn dese astanaǧa nege kelmeidı, Almatyda ne ıstep otyr?" dedı.
Mamai üş jylǧa sottalǧanyn, probasiia uaqytynda Almatydan şyǧa almaitynyn, sondyqtan Skype arqyly bailanysyp otyrǧanyn aitty. Bıraq äielder Mamaidyŋ da aitqanyn tyŋdamai, qaita şulady. Bastamaşyl top äielderden şyǧyp ketudı sūrap edı, olar zaldan şyǧudan bas tartty.
Keiın äielder "Mamai satqyn", "dermokraty, vy nam ne nujny" degen jazuy bar plakattaryn şyǧardy.
Jiyn soŋynda şu säl basylyp, bastamaşyl top partiianyŋ Nūr-Sūltandaǧy ştaby qūrylǧanyn jariialady.
24 qaraşa taŋerteŋ bastamaşyl toptyŋ Qaraǧandydaǧy jiynynda bırneşe adam şu şyǧaryp, jiynnyŋ ötuıne kedergı keltırgen. Şu şyǧarǧandar qoldaryna "Mamai satqyn", "Bız senbeimız" degen plakat ūstap tūrǧan.
Bastamaşyl toptyŋ ötken aptadaǧy Qyzylordadaǧy jiynynda belgısız adamdar daulasyp, jiynǧa kedergı keltırgen. Būl qaladaǧy jinalys keiın partiia qūrylǧanyn qoldaityn tūrǧynnyŋ üiınde jalǧasqan. Bastamaşyl top ökılderı är qaladaǧy şuǧa qaramastan partiianyŋ ştabtary qūrylǧanyn aitady.
Janbolat Mamai 16 qazanda Almatydaǧy jiynda "Qazaqstannyŋ demokratiialyq partiiasyn" qūratynyn mälımdegen. Ol “partiianyŋ maqsaty sailauǧa tüsu emes, eldegı bilık jüiesıne özgerıs engızu, halyqtyŋ ünın bilıkke jetkızu” ekenın aitqan.
Qazır Qazaqstanda "Nūr Otan", "Aq jol", Kommunistık halyqtyq partiia, "Bırlık", "Auyl", JSDP jäne "Azat" partiialary resmi tırkelgen. Onyŋ üşeuı - "Nūr Otan", "Aq jol" jäne Kommunistık halyqtyq partiianyŋ Qazaqstan parlamentınen oryn alǧan.
Qazaqstan zaŋyna sai, partiia qūrǧysy kelgender aldymen myŋ adam qatysqan qūryltai ötkızuı tiıs. Bilık 40 myŋ müşesı bar partiialardy ǧana resmi tırkeidı.
"Azattyq" radiosy
Foto avtory İnga İmanbai
