Qytaidan qaşqan ekı qazaq Qytaiǧa qaitarylady

Qytaidan Qazaqstanǧa "şekarany zaŋsyz kesıp öttı" dep aiyptalǧan etnikalyq qazaqtar Qaster Mūsahanūly men Mūrager Älımūlyn Qytaiǧa qaitaramyz dep mälımdedı Qazaqstannyŋ ūlttyq qauıpsızdık komitetı töraǧasynyŋ orynbasary, şekara qyzmetınıŋ direktory Darhan Dılmanov. 6 jeltoqsanda ūlttyq qauıpsızdık komitetınıŋ baspasöz qyzmetı jarilaǧan videosūhbatta Dılmanov osylai degen. Būl turaly "Azattyq" radiosy habarlaidy. "Sot jäne barlyq qylmystyq jauapkerşılıkke tartu şaralary aiaqtalǧannan keiın bız būl azamattardy meilı Qytai bolsyn, meilı basqa memleket bolsyn, kelgen elıne qaitaramyz. Naqty jaǧdaida bız Qytai Respublikasyna şekaralyq ökıldık qyzmetı arqyly tapsyramyz. Ärı qarai körşı memleket mäselemen özı ainalysady" - dedı Darhan Dılmanov. Dılmanovtyŋ aituynşa, ekı azamatqa qatysty sot jaqynda bastaluy tiıs. Ol Qazaqstannyŋ zaŋsyz köşı-qon prosesımen "qataŋ küresetının" aitqan. Qazan aiynyŋ basynda Qytai qazaqtary Qaster Mūsahanūly men Mūrager Älımūlynyŋ Qazaqstanǧa "şekarany zaŋsyz kesıp ötkenı" turaly aqparat taraǧan. 14 qazanda Almatydaǧy adam qūqyǧyn qorǧau biurosynda ötken baspasöz mäslihatynda Qaster Mūsahanūly Şyŋjaŋdaǧy "saiasi lagerde qamauda bolǧanyn", Mūrager Älımūly Qytaida "qysym körgenın" aitqan edı. Qazan aiynyŋ ortasynda ŪQK olardy "şekaradan zaŋsyz öttı" dep aiyptap, Öskemen qalasyndaǧy tergeu izoliatoryna jetkızgen. Osydan bırneşe kün būryn olardyŋ advokaty Läzzat Ahatova Azattyq tılşısıne tergeu amaldary aiaqtalǧanyn, ıs materialdarymen tanysyp jatqanyn habarlaǧan. Läzzat Ahatova Öskemende qamauda otyrǧan ekı jıgıttıŋ Qytaida qalǧan tuystaryna qysym jalǧasyp jatqanyn da aitqan. Qazaqstan bilıgınen bosqyn märtebesın sūraǧan Qytaidyŋ ekı azamatyna qazan aiynyŋ soŋynda "pana ızdeuşı tūlǧa" kuälıgı berılgen edı. Mūrager Älımūly men Qaster Mūsahanūlynyŋ taǧdyryna alaŋdaǧan bır top belsendı būǧan deiın baspasöz jiynyn ötkızıp, eger Qytaiǧa qaitarylsa, ekeuınıŋ ömırıne qauıp tönetının aityp, Qazaqstan bilıgınen olarǧa bosqyn märtebesın beruın sūraǧan.