Búgin bir mezette eki jańalyq eldi eleń etkizdi. Ekeýi de Qazaqstannyń Reseıdegi tótenshe jáne ókiletti elshisi Imanǵalı Núrǵalıulyna qatysty. Sybaılas jemqorlyqqa qarsy is-qımyl agenttigi «Astana LRT» qylmystyq isi boıynsha Astana qalasy ákiminiń burynǵy orynbasary Qanat Sultanbekovke izdeý jarııalanǵanyn málimdedi. Sultanbekovke qatysty qyzyq jaıt kóp, ol týraly sál keıinirek.
Qazir aıtpaǵymyz basqa jaıt. Aqparat kóziniń habarlaýynsha, Sybaılas jemqorlyqqa qarsy is-qımyl agenttiginiń jedel-tergeý toby Atyraý oblystyq memlekettik kiris departamenti basshysynyń orynbasary G.Dosmaǵambetovany jáne kiris departamenti aýdıt basqarmasynyń basshysy A.Abdrahmanovty ustaǵan. Olardyń meken-jaıyna, jumys ornyna tintý júrgizgen. Buǵan qosa, Atyraý oblystyq kiris departamenti basshysynyń orynbasary Qurmanǵalı Nurǵalıuly Tasmaǵambetovti tergeýge ákelgen. Qazir jedel-tergeý sharalary áli júrip jatyr. Jemqorlyq boıynsha qylmystyq is qozǵalǵany da belgili boldy. Imanǵalı Tasmaǵambetovtiń týǵan baýyryna qatysty basqa derek ázirge qolymyzda joq. Eger ony tergeýshiniń kabınetine ákelgen bolsa, ol qylmystyq is boıynsha «qorǵanýǵa quqyǵy bar kýáger» bolýy múmkin. Bul ne degen sóz? Qorǵanýǵa quqyǵy bar kýáger men kúdiktiniń arasy – bir-aq qadam.
Qurmanǵalı Tasmaǵambetov týraly derek asa kóp emes. Ol 1959 jyly 12 maýsymda Gýrev oblysy, Mahambet aýdanynda týǵan. 1984 jyly Gýrev pedagogıkalyq ınstıtýtyn, 2001 jyly Atyraý munaı-gaz ınstıtýtyn bitirgen. Eńbek ótilin Mahambet aýdanynda mekteparalyq oqý-óndiristik kombınatynda bastaǵan (1986-1988). Mahambet syrttaı-keshki mektebiniń dırektory (1988-1991); Mahambet oqý-óndiristik kombınatynyń sheberi (1991-1992); «MunaıTredıng» ókili (1997); energoresýrsty baqylaý bóliminiń basshysy, Atyraý oblystyq TSh basshysynyń orynbasary (1998-2002); Atyraý oblystyq kedendik baqylaý departamentiniń basshysy (06.2002-012008); Aqtóbe oblystyq kedendik baqylaý departamenti basshysy (01.2008-01.2010); Atyraý oblystyq kedendik baqylaý departamentiniń basshysy (01.2010-2014); Mańǵystaý oblystyq kedendik baqylaý departamenti basshysynyń orynbasary (11.2014-05.2019). Bıylǵy jyldyń mamyr aıynda Atyraý oblysyna qaıta kelip, memkiris departamenti basshysynyń orynbasy bolyp taǵaıyndalǵan.
Endi Qanat Sultanbekov týraly. El ony Imanǵalı Tasmaǵambetovtiń komandasyndaǵy shendi retinde biledi. 2017 jyly ony basqa qylmystyq is boıynsha qamaǵan. «Qazaqstan ınjınırıng» kompanııasymen áriptes bolǵan kásipkerlerdiń aryzymen kompanııanyń sol tustaǵy basshysy Qanat Sultanbekovtiń ústinen qylmystyq is qozǵaldy. Sultanbekov sonyń aldynda ǵana qyzmet aýystyryp, astana ákiminiń orynbasary bolyp taǵaıyndalǵan-dy.
2017 jyldyń 23 aqpany kúni tańerteń Sultanbekovtiń myń sharshy metrden astam atshaptyrym páterinde tintý bastalyp, erteńine túski saǵat úshtiń shamasynda ázer bitkenin bilemiz.
Aqparat kóziniń málimdeýinshe, tintý kezinde burynǵy shendiniń páterinen 1 mıllıard teńgeden astam qarjy tabylǵan. Munymen qosa, asa qymbat saǵattardyń bos qoraby da shyqqan...
Qanat Sultanbekovti kompanııa basshysynyń orynbasary qyzmetinen ustalardan az ýaqyt buryn ǵana bosatyp úlgergeni de nazar aýdaratyn jaıt.
Q.Sultanbekov týraly ne bilemiz? Ol 1976 jyly 1 aqpanda Almaty qalasynda týǵan. Arhıtektýra jáne qurylys akademııasyn «ınjener-qurylysshy» mamandyǵy boıynsha bitirgen. Keıinirek bilimin shetelde jalǵastyrǵan.
1994-2000 jyldary «Almatyqalaqurylys» kópsalaly akıonerlik qoǵamynda túrli qyzmetter atqardy. 2000-2001 jyldary OKIOK konorıýmynda joba ınjeneri boldy. 2001-2004 jyldary «Almatyqalaqurylys» AQ-da bas ınjener, departament dırektory, bas dırektordyń orynbasary boldy. Aıtpaqshy, bul kompanııa ákesi Tańatar Sultanbekovke tıesili.
Kóp uzamaı Qanat Sultanbekov memlekettik qyzmetke keldi. 2004-2007 jyldary Almaty qalalyq ákimdiginde túrli qyzmetter atqardy. Ol kezde Almatynyń ákimi ımanǵalı Tasmaǵambetov edi. Odan keıin Astana qalasy transport basqarmasynyń basshysy bolyp taǵaıyndaldy. 2015 jyly «Qazaqstan ınjınırıng» Ulttyq kompanııasyna basshylyq qyzmetke kelgenge deıin Astana qalasy ákiminiń orynbasary qyzmetin atqardy.
Sultanbekovke qatysty is tup-týra bir jyl tekserildi. Qylmystyq isti Qazaqstan áskerı sotynyń qylmystyq ister jónindegi alqasy qarap, tańǵalarlyq sheshim shyǵardy: «Qazaqstan ınjınırıng» kompanııasy basshysynyń orynbasary Qanat Sultanbekov pen onyń taǵy bir sybaılasy Gılıa Smolınskıge aıyppul saldy. Ádette tym qatal áskerı sot osylaısha ıip sala berdi.
Sultanbekov memleketke 2 mıllıard teńge qaıtarýǵa mindetteldi. Ol aıyppuldy birneshe kúnde-aq tólep tastady. Biraq sol joly osy is boıynsha birneshe adam aýyr jaza arqalap kete barǵan. Olar – QR Qorǵanys mınıstrligi áskerı ókildik ortalyǵynyń basshysy Muhtar Qarabekov, «Kazlegprom-Almaty» JShS dırektory Aıbek Bekturǵanov, Qorǵanys mınıstrligi ortalyq qoımasynyń basshysy Ársen Tólemisov, «Ýralskagroremmash» AQ prezıdenti Gımran Bısenov, 14776 áskerı bóliminiń polkovnıgi Qanat Baıqadamov, «Qazaqstan avıaııalyq ındýstrııasy» JShS basshysynyń orynbasary Málik Syzdyqov, mınıstrlikke qarasty №10 áskerı ókildik basshysy Mberekrehım Gabdýl-Kabırov.
Endi mine, Sultanbekovti «Astana LRT» isi boıynsha ınterpol izdep jatyr. Sultanbekov jáne kompanııanyń burynǵy dırektory Talǵat Ardan biraz ýaqyttan beri shetelde turady. Baıqaýymyzsha, olardy áli uzaq izdeıtin sııaqty. Isti jyly jaýyp tastaý nemese kelisý endi múmkin emesteı. Óıtkeni bul is dońyz jylynyń eń daqpyrtty isi bolýy ábden múmkin. Memleket basshysy Toqaevtyń ózi aqsha jymqyrǵandarǵa qarsy kúresýge pármen berip otyr.
Ulttyq bıýro bir mezette Imanǵalı Tasmaǵambetovtiń týǵan baýyry men senimdi adamyn tuqyrtqanyna qaraǵanda, negizgi nysana bul ekeýi emes ekenin ańǵarýǵa bolady. Bizdiń elde mundaı kezdeısoqtyq eshqashan bolǵan emes. Budan birneshe kún buryn Tasmaǵambetovtiń zeınet jasyna tolýyna baılanysty túrli alypqashpa aqparattar men onyń kishi qajylyqta júrgen fotosy jarııalanǵanyn eskersek, munyń arǵy jaǵynan jaqsy daıyndalǵan jospardyń qulaǵy qyltıyp turǵanyn baıqaýǵa bolady.
Ázirge osy. Biraq eń mańyzdy suraq mynaý: dál qazir Imanǵalı Tasmaǵambetovtiń basyna qara bult úıirý kimge tıimdi?
Derekkózi: Nege.kz
