Qazaqstan Respýblıkasynyń Prezıdenti
Qasym-Jomart Kemeluly Toqaevqa.
Elbasy, Qaýipsizdik keńesiniń tóraǵasy,
"NUROTAN" partııasynyń tóraǵasy
Nursultan Ábishuly Nazarbaevqa
Shyǵys Qazaqstan Oblysy,
Zaısan aýdany, Zaısan qalasy.
Erkebulan Zaǵyparovtan
Jýrnalıstik zertteý
"Et sasysa tuz sebedi, tuz sasysa ne sebedi?" Sońǵy ýaqytta Shyǵys Qazaqstan oblysy Zaısan aýdanynda sybaılas jemqorlyqqa baılanysty zańsyzdyqtar beleń ala bastady. El Prezıdenti sybaılas jemqorlyqty qatań baqylaýǵa alǵandyǵyn sonymen qatar tabıǵı baılyqtardy qatań qorǵaýdy tapsyrǵan bolatyn. Prezıdenttiń atalǵan tapsyrmalary Zaısan aýdanynda qalaı júzege asyp jatyr degen suraq qoıylsa, basshylardyń zańsyz áreketinen kerisinshe áreketter jasalyp jatqany kórinedi.
Aýdanǵa ákim bolyp kelgeli 9 aıdyń júzi bolǵan Aqtanov Serik Qasymbekuly aýdandaǵy qol astynda júrgen biraz memlekettik qyzmetkerlerdi sybaılas jemqorlyq áreketterge ózi ıtermelep jasatyp otyr degen derekter bar. Atap aıtsaq 2019 jyly jaz aıynda Zaısan qalasy jáne 7 aýyldyq okrýgterine jáne Zaısan qalasyna sporttyq alań "Vorkaýttar" salýǵa oblystyq bıýdjetten transfert retinde qarjy bólingen. Bir vorkaýt salý úshin ár aýylǵa 10 mln teńge, Zaısan qalasynada 10 mln teńge qarjy jumsalǵan.
Búgingi tańda aýdanǵa qarasty 7 aýyl okrýginiń jáne Zaısan qalasynyń ákimi vorkaýt boıynsha memlekettik satyp alý zańynyń, normalaryn óreskel buzǵandary úshin 2-retten ákimshilik quqyq buzýshylyq áreketteri úshin jaýypkershilikke tartylyp, olarǵa jaza retinde ár qaısysyna 500 myń teńge kóleminde aıyppul salynǵan. Sonda osynshama aıyppul tólep otyrǵan ákimder ne búldirdi desek, Qazaqstan Respýblıkasynyń memlekettik satyp alý zańyna sáıkes jergilikti ákimderge 1-jyl ishinde 3 myń eseptik kórsetkish kóleminde (2019 jyly 7 mln 575 myń) teńgege deıin jumyspen qyzmet túrlerin bir kózden satyp ala alady degen norma bar.
Bul degenimiz osyndaı jumysty atqarýǵa olar kez kelgen qolynan is keletin kásipkerdi tarta alady degendi bildiredi. Alaıda quny 3 myń eseptik kórsetkishten asatyn jumystarǵa ákimder memlekettik satyp alý zańdylyǵyna sáıkes konkýrs ótkizýge mindetti bolǵan. Biraqta bizdiń 7 ákim vorkaýt qurylysnyń jumysyn IP "Muratbek Jańqut" degen kásipkerge berý maqsatynda 10 mln-dyq vorkaýt jumysyn qaǵaz júzinde ekige bólgen - balalar alańy, úlkender alańy degizip. 10 mln teńgeni ár qaısysy 5 mln teńgege bólip IP "Muratbek Jańǵutqa" bir kózden satyp alyndy dep ár qaısysy 2-den shart jasasqan. Biz biletin ákimder joǵaryda jazylǵan sybaılas jemqorlyqqa qatysty osy áreketterdi aýdan ákimi S.Aqtanov jasatqanyn ashyq aıtyp otyr. Dál osy vorkaýt máselesi boıynsha joǵarydaǵy 8 ákim qurylys zańynyń tártibin buzǵany úshin, qosymsha ákimshilik quqyq buzýshylyq jasaǵandary úshin jaýapkershilikke tartylyp 202 myń teńgeden aıyppul salynǵan. Osy zańsyzdyqtar syrtynda 2019 jyly jaz aıynda Zaısan qalasynyń 8 kóshesinde aǵymdaǵy jóndeý jumystaryn ótkizý úshin 24 mln teńge shamasynda qarjy bólingen bolatyn. Atalǵan jumystardy atqarý úshin qala ákimshiligi memlekettik satyp alý zańynyń talaptaryna sáıkes ashyq konkýrs ótkizýge tıis bolǵan. Sebebi jumystyń quny 3 myń eseptik kórsetkishten úsh ese asyp turǵan. Alaıda bul máselelerde de, zań talaptary óreskel buzylyp, atalǵan jumysqa bólingen qarjy tórt bólikke bólshektenip, aýdan ákimi S.Aqtanovtyń tapsyrmasyna sáıkes Óskemen qalasynda ornalasqan "Evrazııa" JShS-nyń memlekettik satyp alý zańynyń bir kóz tásilimen delinip, tórt shart jasaldy.
Depýtat Q. Saıranov osy zańsyzdyqtardy, joǵarydaǵy jazylǵan sybaılas jemqorlyq əreketterdi aýdandyq máslıhattyń 2019 jyly 24 jeltoqsanynda ótken sessııada qozǵap aıtqan eken. Sol sessııada Q.Saıranov depýtattardan," "Nur Otan" partııasynan birikken komıssııa quryp, əkimderdi zańsyzdyqqa ıtermelep otyrǵan tulǵany anyqtap, jaýapqa tartqyzaıyq" degen. Alaıda osyny estip, bilip otyrǵan prokýratýra, Zaısan aımaqtyq sybaılas jemqoryqpen kúres basqarmasy eshqandaı jumys jasamady.
Kóshe jóndeý jumysyna baılanysty aýdan ákimi S.Aqtanovtyń tarapynan jasalǵan taǵy bir zańsyzdyq shyǵyp jatyr. Ol atalǵan "Evrazııa" JShS Zaısan kóshesine tas qıyrshyq tas tógýde Keńsaı aýyldyq okýrýgine qarasty jerden, zańsyz qıyrshyq tas qazyp alyp, tabıǵatqa zııan keltirgendigi, osy másele boıynsha qazirgi kezde aýdandyq ishki ister bólimi tarapynan qylmystyq is qozǵalyp, sotqa deıingi tergeý amaldary júrgizilip jatyr. Osy "Evrazııa" JShS-na qıyrshyq tas qazyp alýyna oryn belgiliep berýde S.Aqtanov zańsyz tapsyrma berip, eki ákimdi májbúrlegen. Sonda aýdan ákimi S.Aqtanov Prezıdenttiń tabıǵatty qorǵaýǵa qatysty tapsyrmasyna qarsy ma?
Bul jerde bir qyzyǵy, qyzyǵy emes shyjyǵy kóshelerge aǵymdaǵy jumys ótkizedi degen "Evrazııa" seriktestiginen jumys jasaýǵa eshqandaı tehnıka kelmegen. Tek eki jigit kelip aýdan, qala ákimderimen sharýalaryn sheship, tehnıka jaldap jumys istedi. Bul jerde Zaısan aýdanyndaǵy jol jóndeýmen ábden mashyqtanǵan jergilikti kásipkerler, sharýashylyq seriktestikteri nege osy jumysqa tartylmaǵan. Olarda mamanda, tehnıkalarda jetkilikti. Onyń sebebi bireý-aq. Olar S.Aqtanovtyń kóńilinen shyqpaǵan bolýy kerek.
Kezekti bylyq Zaısannyń Kondıýrına kóshesindegi "Kitaptar álemi", "Rahat" saýda úıi tusyndaǵy Arbat qurylysynda oryn alyp otyr. Ol qurylysqa 23 mln 515 myń. 5 teńge bólingen. Osy Arbat qurylysyn júrgizýde S.Aqtanovtyń tapsyrmasy boıynsha " COMPANY COLD" JShS-na qarajatty zańsyz tórtke bólshektep, memlekettik satyp alý zańynyń bir kózden degen tásilimen atalǵan seriktestikpen tórt shart jasasqan.
Biz osynshama zańsyzdyqtarǵa ózine baǵynyshty memlekettik qyzmetkerlerdi sybaılas jemqorlyq áreketterge ıtermelep otyrǵan aýdan ákimi S.Aqtanovtyń zańsyz áreketterine Respýblıka deńgeıinde tosqaýyl qoıyp, tekserip, shara qoldanýyn talap etemiz. ShQO boıynsha Prokýratýra, Sybaılas jemqorlyqqa qarsy is-qımyl Agenttigi tarapynan keletin tekseriske kúmánmen qaraımyz. Sebebi joǵaryda jazǵan bylyq-shylyqtyń kóbin Zaısan qalasynyń turǵyny Almagúl Qurmashqyzy Ahmetjanova jazǵan eken. Osyǵan baılanysty júrgizilgen qarjy baqylaý organdary joǵarydaǵy faktilerdi anyqtaǵan. Alaıda kúni búginge deıin esh nátıje joq. Sondyqtan osy hattyń bir danasyn Prezıdent Q.K.Toqaevqa, Elbasy, Tuńǵysh Prezıdentimiz, "NurOtan" partııasynyń tóraǵasy Nursultan Nazarbaevqa joldaýǵa májbúrmiz.
Sebebi bizdiń túsingenimiz Zaısan aýdanynyń ákimi S.Aqtanovqa Shyǵys Qazaqstan Oblysynda "Áı, deıtin aja, qoı deıtin Qoja joq" kórinedi. Óıtkeni joǵarydaǵy bylyqtan basqa basshylyq kadr tańdaý, taǵaıyndaý máselesinde de ózi bilgenin istep jatyr. Ol másele týraly bólek jýyq arada jazylady.
"Adyrna" ulttyq portaly
