Türkıstan oblysy men Şymkent qalalaryndaǧy mektep-internattardyŋ hälı müşkıl, balalarǧa jaǧdai jasalmaǧan
"Nur Otan" partiiasy janyndaǧy respublikalyq keŋes respublikadaǧy mektep-internattardaǧy jaǧa ūstatarlyq jaittar turaly aitty, dep habarlaidy Sputnik Qazaqstan tılşısı.
"Nur Otan" partiiasy janyndaǧy otbasy, äielder mäselelerı jäne balalardyŋ qūqyqtaryn qorǧau jönındegı respublikalyq qoǧamdyq keŋesınıŋ müşelerı 200 eldı mekendı aralap, 1300-den astam bılım beru, äleumettık qorǧau jäne densaulyq saqtau mekemelerınıŋ jūmysyn tekserıp şyqty. Keŋes töraǧasy Dinara Zäkievanyŋ aituynşa, respublika boiynşa, negızınen, Türkıstan oblysy men Şymkent qalalaryndaǧy mektep-internattardyŋ hälı müşkıl, balalarǧa jaǧdai jasalmaǧan.
"Bırneşe mysal keltıreiın. Türkıstan qalasyndaǧy Erubaev atyndaǧy mektep-internat sanitarlyq normalarǧa sai emes. 385 bala jyldyŋ on aiyn sol internattyŋ qabyrǧasynda ötkızedı. Ydystardyŋ arasynda taraqandar jür, ydys-aiaqtar synyq. Auladaǧy därethanalar balalar üşın qauıptı, las, gigiena saqtalmaǧan", - dedı ol partiiada ötken jiynda.
Aituynşa, qazır jaǧdai qalpyna keltırıldı. Toŋazytqyş, kır juǧyş maşinalar, elektr plitalary jäne basqa da qajettı jihazdar satyp alyndy.
Qoǧamdyq keŋes müşelerınıŋ tekserısınen keiın Almaty oblysyndaǧy Sarqan internatyndaǧy jaǧdai da tübegeilı özgergen. Ǧimarattyŋ ışınde sanuzel bolmaǧan, balalar tün ortasynda dalaǧa şyǧuǧa mäjbür eken.
Zäkievanyŋ aituynşa, qazır jobalyq-smetalyq qūjattama äzırlendı, osy jyldyŋ soŋyna deiın jöndeu jürgızıledı. İnternattyŋ materialdyq-tehnikalyq bazasyn jaŋartuǧa 11,5 million teŋge bölındı.
Şymkenttegı Sairam şaǧyn audanynda ornalasqan mekteptegı jaǧdai da köŋıl könşıterlık emes. 1260 oquşyǧa şaqtalǧan mektepte jalǧyz ǧana qol juǧyş. Temır qol juǧyştyŋ özı köşede ornatylǧan.
"Qazırgı taŋda jobalyq-smetalyq qūjattama daiyndaldy. Sumen qamtu, kärız jüiesın tartu üşın 10,5 million teŋge qarastyryldy. Biyl jöndeu jürgızıledı", - dedı keŋes töraǧasy.
Respublikalyq keŋes tarapynan eskertu alǧan mektepter men internattar üşın onnan otyz bes million teŋgege deiın qarjy bölıngen. Jöndeuge daiyndyq jürgızılıp jatyr.
"Jalpy mūndai jaǧdailardyŋ basym bölıgı Türkıstan, Almaty, Batys Qazaqstan oblystary men Şymkent qalasynda tırkeldı. Osyǧan bailanysty bız äkımdıktermen bırge osy mekemeler boiynşa jūmysty jalǧastyrudy josparlap otyrmyz. Olardyŋ sany – 518. Ärqaisysynda qyryqtan tört jüzge deiın balalar tūrady", - dedı ol.
Qoǧamdyq keŋes müşelerı 311 mektep pen internatty aralaǧan.
