Qazaqstannyń Ishki ister mınıstrliginiń ókilderi Jambyl oblysy Qordaı aýdanyndaǵy tártipsizdikter saldarynan qaza bolǵandardyń arasynda Masanchıge basqa aýyldan kelgen bir adam bolǵanyn rastady, - dep habarlaıdy Tengrinews.kz tilshisi.
"Darhan Ábdirahym týraly ne bilemiz? Ol - qazaq. Osy kúnge deıin týǵan-týystary onyń qaıtys bolǵany týraly habar alǵan joq. Darhan jeke tasymaldaýmen aınalysqan. Onyń qujattary mashınada bolǵan. Qaqtyǵys bolǵan túnde ol Masanchıge aýdannyń basqa turǵyndary sııaqty kómekke barǵan. Jigit 25 jasta edi. Ol qan-josa bolyp jatqan jerinen tabylǵan. (...) Mashına búlingen, qujattar joǵalǵan. Ol otbasynda jalǵyz bala edi. Onyń artynda úsh balasy qaldy. Kóligin kredıtke alǵan. Jergilikti atqarýshy organdardan qaıtys bolǵan adamnyń ata-anasyna áli eshkim barǵan joq. Jýrnalıster de bolǵan joq. Ótken kúnnen beri qaza tapqan jas jigitterdiń esimi taraldy. Nege Darhan týraly málimet belgisiz?", - dep jazdy Azamat Erǵalı Facebook-te.
IIM baspasóz qyzmetindegiler Darhan Ábdirahymnyń qaza tapqan 10 adamnyń ishinde baryn rastady.
"Iá, ol (Darhan Ábdirahym) qaza tapqan 10 adamnyń ishinde bar", - dedi baspasóz qyzmetindegiler.
Buǵan deıin Masanchı aýylyndaǵy tártipsizdikte qaza tapqan 8 adamnyń tizimi jarııalanǵan edi.
Eske salaıyq, 7 aqpanda Jambyl oblysy Qordaı aýdany Masanchı aýylynda turǵyndar arasynda jappaı tóbeles boldy. Oqıǵa saldarynan 8 adam qaza tapty. Medıınalyq mekemelerge 137 adam kómek surap keldi.
