Jýrnalıst Gúljan Erǵalıev qazaq halqy, onyń ishinde bılik, úkimet, qoǵam – dunǵandardan keshirim suraýy kerek deıdi. Bul oıyn jýrnalıst áleýmettik jelidegi paraqshasynda ortaǵa saldy dep habarlaıdy Dalanews.kz.
Onyń aıtýynsha armıandar Qaraǵandyda qazaqtyń ólimine sebepker bolǵanda, armıan dıasporasy kúlli qazaq halqynyń aldynda keshirim suraǵan. Osy arqyly óziniń sanaly, arly ult ekenin dáleldegen.
“Qazaqtar dunǵandarǵa qol kóterip, dúnıeni tóńkergen tusta, bizdiń depýtattar da, bılik te, qoǵam da osy bir at tóbelindeı ulttan keshirim suraǵan joq.
Bul oqıǵa qazaqtyń súıegine tańba.
Muny kórgen bolsa, babalar ne der edi? Qaýqarsyzǵa qol kótermeıtin ata-babalarymyz búgingi urpaǵy sekildi ózinen álsizge álimjettik jasap, úıin órtep, erkek kindiktisin tentiretip jibermes edi. Kerisinshe, keshirim surar edi.
Já, bulaı jasaýǵa namystaryń jibermese, endeshe men daıynmyn.
Men Qazaqstan azamaty, Gúljan Erǵalıeva – Qazaqstandaǵy dunǵan dıasporasynan keshirim suraımyn. Qaza bolǵan jaqyn-juraǵatyna qaıǵyryp kóńil aıtamyn.
Sizderdi qorǵaı almaǵan bizdiń bıliktiń beıqamdyǵy men jaýapsyzdyǵy úshin keshirim ótinemin. “Aqtaban shubyryndyǵa” ushyraǵan dunǵandar tragedııasynan keıin elde qaraly kún jarııalanýy kerek edi.
Memleket óz tarapynan zardap shekkenderge ótemaqy tólep, osynaý zańsyzdyqqa jol bergenderi qatań jazalaýy tıis.
Budan keıin mundaı soraqylyqtyń qaıtalanǵanyn qalamaımyn. Bul bárimizge sabaq bolýy tıis. Sizderdiń qaıǵylaryńyzǵa ortaqpyn”, – deıdi Gúljan Erǵalıeva.
