...Ol ekeýmiz bala kezden birge óstik. Úıimizdiń arasy da onsha qashyq emes edi. Bir mektepte oqymasaq ta, bos ýaqytta jubymyz jazylmaıtyn. Eseıe kele "qyzdy aýyldyń ıtin úrgizip", birge júrgen kúnderimiz qandaı shýaqty edi. Arman qýyp Almatyǵa attanǵanymda, ol aýylda qaldy. Júrgizýshi bolyp, qala men aýyldyń arasyndaǵy joldy biraz tozdyrǵany bar. Sóıtip júrip Almatynyń bir arýyn aýylǵa kelin ǵyp túsirgende bárimiz de qýanǵan edik...Kóp uzamaı jaısyz habar estidim. Kelinshegi tórkindep ketip qaıtyp oralmapty. Úsh aılyq sábı birge ketipti. Dos ishkilikke salyna bastaǵan. Toqsanynshy jyldar edi ǵoı. Ol kezde kim araqqa salynbady deısiz! Talaı, talaı atpaldaı azamattarymyz osy bir ajdahanyń aýzyna túsip, ajal qushyp jatty emes pe! Dos ta solardan alysqa barmady. Aýylda sendelip júrip, artynan áldebir qańǵybastardyń jeteginde ketip, qala mańyndaǵy saıajaılarda ózi de solardyń jolyna tústi dep estidik. Dostary qoldarynan kelgenin istedi. Tipti, álgi ázázilden emdeıtin aýrýhanaǵa da jatqyzyp kórdik. Bolmady. Az ýaqyttan soń burynǵy ádetine qaıta basatyn. Sońǵy ret dostardyń naýryzǵa jaıǵan dastarhanynda kezdesip edik. Aýrýhanadan shyqqan kezi bolsa kerek, tatyp almady.Otyrys qyzyp jatqan bir tusta meni qapsyra qushaqtap qulaǵyma sybyrlady.
-Dosym-aý, meniń bir armanym bar! Qyzymdy kórgim keledi. Qandaı bolyp ósti eken?
-Densaýlyǵyńdy túzep alsań áli - aq kóresiń. Tek jazylyp ketshi,-degenim de esimde. Úlgermedi. Arada az ýaqyt ótkende qaraly habar estidik. Aıdaladan óli denesin bireýler taýyp alypty. Álgini kóp iship qoıǵan desedi...
...Kabınetimde ádettegideı jumys izdegenderdiń rezıýmelerin qarap otyrǵanmyn. Qasymda sport sholýshymyz
Amankeldi Seıithan áriptesim de bar edi. Bir kezde kezekti bir ómirbaıandy oqı berip, júregim dir ete tústi. Óz kózime ózim senbeı qaıta oqydym. Sol ǵoı, sol! Ákesiniń aty- jónin, óziniń kishkentaı kezinde anasymen ajyrasyp ketkenin jasyrmaı jazypty. Qyz bala eken . Taǵdyr degendi qoısaıshy! Dosymnyń ómir boıy saǵynyp ótken qyzy meniń aldyma keler dep kim oılaǵan? Erteńine úmitkerlermen áńgimelesý barysynda ózin de kórdim-aý. Qaıran dostyń aýzynan túskendeı bolyp, montıyp otyr. Biraq, erte eseıgen, ómirdiń ózi shıryqtyrǵan qyz ekeni birden baıqalady. Qandaı saýalǵa bolsa da múdirmesten jaýap beredi. Jumysqa qabyldaýshylarǵa da birden unady.
...Men ol qyzdy qazir de kórip qalamyn. Qashan kórsem aǵalap turǵany. Biraq "men ákeńniń dosymyn" dep aıta almadym. Eshqashanda aıta almaıtyn da shyǵarmyn. "Qaıda? " dese ne deımin? Anaý ázázildiń qurbany boldy dep qalaı aıtamyn? Qııalyndaǵy ákeniń sol bıik qalpynda qalǵany da durys shyǵar. Qaıran dos-aý, osy bir jaýqazyndaı jaınaǵan qyzdyń mańdaıynan ıiskep, myna ómirdiń rahatyn kórip júretin jóniń bar edi ǵoı. Átteń-aı! Átteń...
Arman Sqabyluly,
2014 jyl.Almaty.
