«Nūr Otan» partiiasynyŋ Jetısu audandyq filialynda 1916 jylǧy ūlt-azattyq köterılısınıŋ 100 jyldyǧyna orai, «Alaş arystary ūlt-azattyq köterılısı barysynda» degen taqyryppen döŋgelek üstel öttı. Būl şarany Almaty qalalyq Işkı saiasat basqarmasynyŋ qoldauymen «Adyrna» ūlttyq-etnografiialyq bırlestıgı ūiymbastyrdy.
Onda arnaiy şaqyrylǧan tarihşylar Şämek Tıleubaev pen Raşid Orazov baiandama jasap, köptegen tarihi derektermen oi bölıstı. Mysaly, «Amangeldı İmanov Mırjaqyp Dulatovtyŋ qolynan qaza tapqan» degen qaŋqu söz aitylyp kelgenı jasyryn emes. Al şyndyǧynda, M.Dulatov A.İmanovty ūstatyp, türmege qamattyryp qoiǧanymen, odan belgısız küşterdıŋ kilıguı äserınen airylyp qaldyq» – degen Şämek Tıleubaev odan ärı M.Dulatovtyŋ jazǧan hatymen tanystyrdy. Būl rette ol «Alaş kösemderınıŋ bırı köterılıs basşysyn öltırdı» degen söz halyqty alaştyqtarǧa qarsy qoiudyŋ äreketınen tuǧandyǧyn alǧa tartty.
«Jas Otan» jastar qanatynyŋ müşelerı jinalǧan būl şaraǧa dästürlı änşıler J.Qūjimanov, E.Nūrhanov, J.Saqailar da belsene atsalysty. Olar ūlt-azattyq köterılıs tūsynda şyqqan «On altynşy jyl» (Samaltau), «Alaş marşy» jäne «Jıgıtter» änderın äuelete şyrqady. Jastar dästürlı änşılerdıŋ önerıne täntı boldy. Soǧan orai «Bızge, jastarǧa, tarihymyzdy tanyp-bıludıŋ maŋyzy zor», – deidı «Jas Otan» jastar qanatynyŋ jetekşısı Almat Äsenov. Söitıp, būl künı jastardyŋ öz tarihyn tanyp-bıluge degen qūlşynysyn körıp, köŋılımız bır marqaiyp qaldy.
Jasūlan NAURYZÄLI,
"ALMATY AQŞAMY"
