"Adyrna" ūlttyq-etnografiialyq bırlestıgı" qoǧamdyq qorynyŋ ūiymdastyruymen Altai Respublikasynan kelgen önerpazdar Yrystu Mecheşev pen Altyn-Ai Baratovalar men qazaq änşılerı Jolaman Qūjimanov, Erkın Nūrhanov, Baqtiiar Aqymjanov «Däulet» şarua qojalyǧynyŋ qymyzhanasynda bas qosyp, täjıribe almasty. Şaraǧa niderlandiialyq türıktanuşy ǧalym Bılge Özel de qatysyp, qazaqtyŋ erekşe darhandyǧyna razy boldy.
Şeteldık qonaqtar bıraz uaqyt būryn elımızge kelgen. Ekı-üş künnen soŋ Qyrǧyzstanǧa saparlap kettı. Endı, mıne, saparlaryn aiaqtap, qazaq jerıne qaita taban tırep otyr. "Däulet" şarua qojalyǧynyŋ direktory Ötemıs Mahanovtyŋ zaiyby, ot anasy Märiiam apamyz qonaqtarǧa et asyp, qazy-qartasy men qymyzyn ūsyndy. «Qyrǧyzda da qymyzǧa qaryq boldyq, bıraq osy qymyzdyŋ dämındei bolmady», – degen qonaqtar üi iesıne yrzalyǧyn jetkızdı. Köptegen jyldar boiy jylqy şaruaşylyǧymen ainalysyp kele jatqan Ötemıs aǧa jylqynyŋ qasietterı men qymyz baptau ädısterı turaly äŋgımelep berdı. Betpaqdalany kesıp ötıp, mal aidaǧan aqsaqaldyŋ äserlı äŋgımesın tyŋdai otyryp, tabaq-tabaq etke bas qoidyq. Astan keiın äŋgıme özegı änge auysty. Ändı kez kelgen jerde tyŋdauǧa bolar. Bıraq, tuysqan ekı eldıŋ änşılerı alma-kezek än salǧan jerde otyru, tıptı, tamaşa eken. Yrystu men Altyn-Ai «Qūlyn», «Maadai Qara», «Jylqy» sekıldı şyǧarmalaryn oryndasa, J.Qūjimanov halyq änı «Ekı jirendı», E.Nūrhanov Ükılı Ybyraidyŋ «Qaldyrǧanyn», B.Aqymjanov Bırjan saldyŋ «On sausaǧyn», Berıkboldyŋ «Aǧaş aiaǧyn», «Nartaidyŋ termesın» äuelettı. Dästürlı önerge janaşyrlyqpen qaraityn Ötemıs aǧa ekı eldıŋ dästürlı änşılerın bır dastarhan basyna jinap, olardyŋ özara pıkır almasyp, täjıribelerımen bölısuıne mümkındık jasady.
Jasūlan NAURYZÄLI
