Osydan 98 jyl būryn, 1922 jyly jazuşy, dramaturg, Qazaqstannyŋ halyq jazuşysy Safuan ŞAIMERDENOV düniege keldı.
Soltüstık Qazaqstan oblysy, Presnov audany (qazırgı Jambyl audany), Amankeldı auylynda tuǧan. Orta mekteptı bıtırgen soŋ, bırşama uaqyt öz auylynyŋ ortalau mektebınde mūǧalım, Armiia qatarynda boldy.
1942-1943 jyldary Presnov audandyq komsomol hatşysy, 1942-1945 jyldary «Lenin tuy» gazetınde tılşı, ädebi qyzmetker. 1950 jyly QazMU-dıŋ filologiia fakultetın üzdık bıtırdı. Sodan keiın respublikalyq jastar gazetınıŋ Qaraǧandy oblysy boiynşa tılşısı, 1952 jyly «Ädebiet jäne öner» jurnalynyŋ bölım bastyǧy, Qazaqstan Jazuşylar odaǧy proza seksiiasynyŋ meŋgeruşısı, 1955 jyly «Qazaq ädebietı» gazetı bas redaktorynyŋ orynbasary, 1958-1960 jyldary Qazaqstan Jazuşylar odaǧy basqarmasynyŋ hatşysy, 1970-1975 jyldary Qazaq KSR Mädeniet ministrlıgı repertuarlyq alqasynyŋ basşysy bolǧan.
«Bolaşaqqa jol» atty alǧaşqy romany 1953 jyly jaryq kördı. Būl tuyndy keiın «İneş» degen atpen orys tılıne audaryldy. «Ömır nūry» atty povester siklıne taqyryby, ideiasy jaǧynan özektı bır jelı, bır nysanaǧa baǧyndyrylǧan alty povest - «Mezgıl», «Qarǧaş», «Ömır nūry», «İt aşuy», «Mäjnün tal» - kırgen. Olar şetel tılderıne äldeneşe ret audarylǧan. «Qaidasyŋ, Zarina?», «Qyr gülı», «Änım sen edıŋ», «Marǧau», «Tört boidaq, bır qyz», «Ökıl äke», «Tüie kötergen», «Aruana dünie» pesalary köptegen qazaq teatrlarynyŋ sahnasynda qoiylyp keledı.
Ündı jazuşysy R.Tagordyŋ «Küireu», «Gäuırmaqan» romandary men «Altyn saǧym» degen atpen jaryq körgen äŋgımeler jinaǧyn, L.Tolstoidyŋ «Albert» povesın, belarus dramaturgı A.Makaenoktyŋ «Tribunalyn», fransuz kompozitory Erve men dramaturg A.Miliajdyŋ «Tülkı bikeş» komediiasyn audarǧan. «Jyl qūsy» povesı 1974 jyly VSSPS pen KSRO Jazuşylar odaǧynyŋ jūmysşy taqyrybyna arnalǧan konkursynda jüldelı orynǧa ie boldy.
Al R.Tagordyŋ «Küireu» romanynyŋ audarmasy üşın 1984 jyly Qazaqstan Jazuşylar odaǧynyŋ syilyǧyn, «Aǧalardyŋ alaqany», «Ädebi tolqyndar» atty kıtaptary üşın 1988 jyly respublikanyŋ Abai atyndaǧy Memlekettık syilyǧyn aldy.
1992 jyly Qazaqstan Respublikasynyŋ Halyq jazuşysy qūrmettı ataǧyna ie boldy. «Otan», «Qūrmet Belgısı» ordenderımen marapattaldy. Petropavl qalasynyŋ Qūrmettı azamaty.
2007 jyly Petropavlda qaitys boldy.
Ūqsas jaŋalyqtar
