Qytaıdyń Qazaqstandaǵy elshisi Chjan Sıao jýyrda jarııa bolǵan "Qazaqstan nelikten Qytaıǵa oralýdy ańsaıdy" atty atyshýly maqalaǵa qatysty pikir bildirdi.
"Mynaǵan basymdyq bergim keledi. Jýyrda Qytaıdyń táýelsiz kontentinde jarııa bolǵan maqala eshbir resmı oryndardyń kózqarasyn tanytpaıdy. Alaıda, bul jaǵdaı qazirgi tańda ǵalamtordyń jalǵan, las, ári árqıly ósek-aıań aqparattarǵa tolyp ketkenin aıshyqtap berdi. Sondaı-aq, eki eldiń qarym-qatynasyna keri yqpalyn tıgizetin mundaı dúnıelerdi joıýda qos tarap ta belsendi sharalar qabyldaý qajettigin uqtyrdy. Men sonymen qatar, QR SIM-niń birinshi orynbasary Shahrat Nuryshev myrzamen kezdesý barysynda, Qazaqstan-Qytaı dostastyǵynyń ǵasyrdan-ǵasyrǵa jalǵastyǵynyń kepili retinde bizge tarıh oqýlyqtarynyń mazmunyna erekshe mán berý kerektigin, sóıtip jas urpaqty tarıhtyń shynaıy kózqarasy negizinde tárbıeleýdiń asa mańyzdy ekenin aıttym"
Bul úzindi Qytaıdyń "Global Taıms" gazeti men portalynyń Qytaı elshisimen júrgizgen eksklıýzıvti suhbatynan alynyp, aýdaryldy.
Budan bólek, Qytaıdyń áleýmettik jelilerinde Qazaqstannyń atalǵan maqalaǵa oraı, Qytaıǵa narazylyq notasyn joldaý áreketin synǵa aldy.
"Qazaqstan túımedeıdi túıedeı etti. Bul atalǵan eldiń dıplomatııasynyń jetilmegenin bildiredi. Jekelegen qoldanýshylardyń pikiri tutas bir eldiń kózqarasyn tanytpaıdy. Internet - ashyq platforma. Sol sebepti árkimniń aýzyna qaqpaq bolý múmkin emes. Shet elderde Qytaıdy qaralaǵan maqalalar resmı saıttardyń bas betterinde tolyp tur. Qazaqstanda da az emes. Sol sııaqty Qazaqstanǵa qara kúıe jaqqan maqalalar Batysta da bar. Shaǵymshyl bolsa olarǵa nege qarsylyq bildirmeıdi?" deıdi narazylyq notasyna narazylyq tanytqan bir portalynda. Qytaıdyń bul jazbasy 510 myńnan asa qaralyp, kóptegen pikirler jazylǵan.
Ótken aptada Qytaılyk sohu.com saıtynda jarııa bolǵan "Qazaqstan nelikten Qytaıǵa oralýdy ańsaıdy" maqalasy saıttan alyndy.
Sońǵy ýaqytta Qytaı elshisin shaqyryp narazylyqtaryn bildirip jatqandar elder bar. Mysaly, jýyrda qaralardy renjitti dep afrıkalyqtar da shaǵym túsirgen.
