Äŋgıme
Ölıp qalyppyn. Özımdı ainadan ǧana köruşı em, endı öz mäiıtım özımnıŋ köz aldymda. Kım bırınşı bıledı eken dep, kütıp jatyrmyn. Alǧaş sezgen – ülken ūlym. Onyŋ qasyma ne üşın kelgenın bılmeimın, jaqyndap, iyǧymnan türtkılei bastady.
-Tūrsaŋşy, äke! Auyz bekıteiık dep jatyrmyz. Şeşem senı ǧana kütıp otyr,- demekşı boldy ǧoi deimın. Aqiǧan közımdı körıp, toqtaǧan demım men suyǧan denemdı bılgennen keiın aŋyrap, şeşesıne qarai jügırdı. Qūdai-au, kuhniadaǧy dastarhan basynda dūǧa oqyp otyrǧan şeşesıne onyŋ aitqan sözın anyq estıdım.
-Äkem ölgen adam siiaqty jatyr. Demı toqtap, denesı suyp, közı aqiyp ketken,- dedı abdyrap. Jylamsyrap söilegen siiaqty, közı botalap kettı ǧoi deimın: qatynym saspastan:
-Nemenege soraŋdy aǧyzyp tūrsyŋ? Ölgen adamnyŋ qandai bolatynyn sen qaidan bılesıŋ? Qazır köremız,- dedı.
Ūlym äskerde jürgende asylyp-atylyp ölgen soldattardyŋ köp bolǧanyn, solardyŋ bırazyn arulap tabytqa salǧanyn aityp jatqan siiaqtandy. Qatynym apyrlai-topyrlai kelıp, aduyndy şapalaqtyŋ ışı-syrtymen ekı betımnen:
-Tūr-ei, alqaş! Jatysyn qaraşy sümıreigen sümelektıŋ!- dep, kezek-kezek osyp-osyn jıberdı. Būryndar, şynymen, sümıreiıp ūşyp tūruşy em, būl joly bylq etkem joq. Sodan keiın balan üirek jäne ortan terek sausaqtaryn bügıp, ekeuın qyşqaş qyp aşyp aldy da, mūrnymnan qysyp, jūlqylap, būrap-būrap jıberdı. Kenet:
-Oibai! Kötök! Myna jeksūryn, şynymen, ölıp qalǧan ba? Alqaştyŋ sandyraǧyn aityp jür me desem? Bäse, bäse! «Tüsımde äjemdı kördım, menı şaqyra beredı. Marqūm äkem de bırdeŋe dämetıp jür ǧoi deimın, meşıtke baryp qūran oqytyp, sadaqa bermesem bolmaidy» dep, menen 5 myŋ teŋge sūrap alǧan. Qaidan bıleiın... Būryn da osyndai sözderdı san qaitalap, udai mas bop keletın...- dep, sūŋqyldai jöneldı.
-Ne ısteimız?!- dedı ūlym jasqana söilep.
-Ne ıstegenı qalai? Koronovirus kezınde ölgenı dūrys boldy. Äiteuır, ekı ret virustyŋ aqşasyn aldy. Ömır boiy jazuyn jazyp, basyn jazyp qana öttı. Jalǧan dostary men jalaŋ būt qalamdastarynan basqa jiǧan eşkımı de, eşteŋesı de joq. Özımız-aq kömemız...
Qatynymnyŋ tarpaŋdap söilegenı sonşalyq, tırılıp kete jazdap baryp, ölgenım esıme tüsıp, ünsız qaldym. Bıraq, qatynymnyŋ sözı ūlyma da ūnamaǧan syŋaily.
-Kömemız degenıŋız qalai? Jerleimız dep aitsaŋyzşy! Jäne eşkımı, eşteŋesı joq dep aitpaŋyz! Halqy bar, artynda qalǧan mol mūrasy bar,- degen ūlymnyŋ sözı köŋılıme jaǧyp kettı. Ornymnan tūrmaq ta boldym, bıraq, ölgenderge öituge bolmaidy ǧoi.
-Äi, sen de äkeŋ sekıldı jetesızsıŋ! Miǧūlasyŋ! Eşkımge qajetı joq şimai-şatpaǧyn mūra deidı ǧoi... Artynda milliondaǧan aqşasy, el qyzyǧatyndai dünie-mülkı qaluy kerek edı. Sen qyzyǧatyndai, senıŋ kädeŋe, bır paidaŋa jaraityndai nesı qaldy? Aqşasy barlardy ǧana TAUDAǦY KEŊSAIDA jerleidı. Al, äkeŋ siiaqtylardy Boraldaidyŋ qūmyna köme salady. Baryp körşı özıŋ. Köbısınıŋ basynda tas ta, belgı de joq. Tıptı, kım ekenı belgısız. Äiteuır, bärı bır qorşaudyŋ ışınde,- dep, qatynym auzy köpıre söilep, ūlymdy basyp tastap, ekeuı menıŋ ölıp jatqanymdy qolma-qol ūmytty. Tuystaryma, basqalarǧa qalai habarlaidy, qalai daiyndalady, qaida jerleidı, bärı-bärı jaiyna qaldy. Morgtyŋ iesız mäiıtterdı satatyny, soiyp-soiyp, bärın midai aralastyryp, bır körge köme salatyny jaily qatynym äŋgıme bastady.
-Ne üşın?- dedı ūlym.
-Medakademiianyŋ studentterıne soidyryp, ota jasatyp üiretu üşın,- dedı qatynym. Būl – men eşqaşan oilanbaǧan, tolǧanbaǧan jait. Ūlym da:
-A, iä, endı tüsındım. Morg – medakademiia men mäiıttıŋ ortasyndaǧy posrednik. Znachit, morg mäiıtterdı medakademiiaǧa satady. Marqūmdardy soiyp, medisinalyq saraptama jasap baryp qana tuystarynyŋ qolyna beru jönınde ministrdıŋ būiryǧy bar. Olardy da osy maqsatqa paidalanady eken ǧoi,- dedı bılımdarlyǧyn körsetıp.
-Morgke aqşa tüsse boldy: bylaiǧy jūrtqa da satady. Ana kottedjı, ekı-üş djipı, dombyra jasaityn şeberhanasy bar Dörbıthandy bılesıŋ ǧoi. Sol jasaǧan dombyrasyna adamnyŋ ışegın salady deidı. Dombyralary –şeşen, ǧajap söileidı! Aǧaşy da keremet. Bır dombyrasy 3-4 myŋ dollar. Batys jaqqa odan da qymbatqa satady. Mäiıttıŋ satatyn basqa jerlerı de köp, mäselen, qolaŋ şaşy... Bıraq, qalqiǧan äkeŋnıŋ qai müşesın satasyŋ? Samopal men qytaidyŋ spirtınen organynyŋ bärı qoq bop küiıp ketken şyǧar...
-Mama, ne aityp kettıŋız özıŋız? Ondaidan qūdai saqtasyn! Äkemdı Keŋsaiǧa aparyp ataqtylardyŋ qasyna jerleimın! Basyna mramordan eskertkış te tūrǧyzamyn!- dedı ūlym nyq senımmen.
-Äi, aqşany qaidan tabasyŋ? Qazır – karantin. Äkeŋdı arqalaǧan senı ol jaqqa ötkızbeidı. O jaqtyŋ jerı būryn 3 myŋ dollar edı, qazır mülde qymbattaǧan şyǧar. Osyny jetıskennen aitady deimısıŋ? Janazasyna jinalǧan aqşa jete me dep, sony oilap otyrmyn. Bır jaǧy, myna koronovirus jaqsy boldy. Janazasynda 10 adamnan artyq qatyspaityn şyǧar, alystaǧy tuystary kele almaidy. Bıraq, «janazaǧa qosatyndaryŋdy jıberıŋder!» deimız ǧoi. Aitpaqşy, kaspii goldyn tauyp qoiaiyqşy, toptarǧa, tuystaryna salamyz,- degen qatynym ünsız telmırıp, maǧan baǧjiia qarap, tapjylmai ūzaq otyrdy. Ölgen adam da qorqady eken-au, şoşiyn dedım. Endı ol özınen-özı söilep, jan şoşyrlyq, joq, joq: janym joq eken ǧoi, adam şoşyrlyq söz aitty. Janym baǧana mūrnymnan ūşyp şyǧyp ketse de, qyzynyp, älı keppegen qanym oinap, tırılıp kete jazdap, tyŋdap jatyrmyn.
-Qyryq jyl 2-3 jerde jūmys ıstep, orys pen ūiǧyrdyŋ bosaǧasynda jürıp, ırkıp aqşa jinap, jer satyp alyp, üi salyp, endı adam bolamyz degende, qaraşy... Myna qazaqtyŋ keŋ, darhan dalasynda ömır sürıp, ölgenge de jer satyp alasyŋ. Jäne udai qymbat! Bızdıŋ ökımet tırı kezıŋde qanyŋdy, ölgende janyŋdy sorady. Myna baiǧūs zar-mūŋyn qalamyna tögıp, araǧyn ışıp, eşteŋe körgısı kelmeuşı edı! Sol üşın eken ǧoi! O şūnaq qūdai! Nemerelerım men jienderımdı ortaǧa alyp, bır kün bolsyn, rahatty kün keşem be dep em, tozaǧym endı bastaldy deseŋşı! Ömır boiǧy maqsatym – aqşa, aqşa, aqşa! Nemerelerımnıŋ tılı de «Aqşa! Aqşa!» dep şyqty. Myna baiǧūs ta 40 jyl boiy anda-mūnda tentırep, «özımnıŋ qaltama emes, qazaǧyma qyzmet etemın» deuşı edı... Al endı qadırıŋdı qai qazaǧyŋ bıler eken? Ölımnıŋ «kedeidıŋ kötın aşamyn» degenı osy! Aşyldy, mıne, kötıŋ!- dep, zar ilegen äielımnıŋ sözı sai-süiegımdı syrqyratty.
Aitpaqşy, ölgen adamnyŋ sai-süiegı syrqyrai ma?! Ömırdıŋ azaby menı ne üşın qūrsaulap, ana ömırdıŋ esıgın ne üşın aşa almai jatyrmyn? A, iä, iä, qaryzdarym bar eken ǧoi basymnan asatyn. Kredit, dükenderge bereşegım, oryndai almaǧan uädelerım, maqsattarym men armandarym, balaǧattaǧan adamdarym, tılımnıŋ qanyn aǧyzyp otyryp tıldegen şeneunıkter... Olardyŋ eşqaisysynan keşırım sūrap ülgermedım! Ärı, janaza namazym da oqylǧan joq. Osynyŋ bärı aiaǧymnan tartyp, janymdy rahatqa böleitın ölım älemıne jıbermei jatyr eken ǧoi. Älı de zıl batpan bolǧan jügımdı arqamnan tüsırıp, menı ertoqymy alynǧan qūr attai qylyp ana düniege jıberetın tırı adam tabyla ma?! Ūldarym bar emes pe? Qūdaiǧa şükır, ınılerım de jer basyp jür. A, iä, iä, kenje ūlym – qara şaŋyraqtyŋ iesı bar ǧoi. Qazaqtyŋ dästürı solai deidı. Bıraq, bıraq... öz künın özı qalt-qūlt etıp äreŋ körıp jürgen aqköŋıl kenje ūlym men üşın taǧdyrdyŋ tarazysyna tüsuge köner me?! Jä-ä, qoiaiynşy, būl menıŋ şaruam emes, artymda qalǧan tırıler oilansyn: men öldım emes pe?! Endıgı mındetım – qiiamet künı kelıp jetkenşe, närestedei päk janymdy rahatqa bölep, jer-besıgımde typ-tynyş ūiyqtau. Tırşılıktıŋ qam-qareketı äbden qajytyp, jūlma-jūlma bolyp, sualyp semıp, kepken jüregım, tyşqan kemırıp bıtırgenşe, läzatty bır küi keşsın... Bıraq, bıraq... Artym tiianaqtalar ma?! Ürım-būtaǧymnyŋ ışınen menıŋ qaryzdarym men bereşegımdı moinyna alyp, arman-maqsattarymdy boiyna qondyratyn bıreu tabylmai jatsa, qadym zamannan berı bärın tiianaqtaǧan ata-babamnyŋ attamaǧan dästürı bar emes pe?! Sony sanasyna sıŋırgen bıreuı erlıkke jügıner, taǧdyrdyŋ tälkegımen arpalysar, alysar... Tek, adamdar tarapynan men siiaqty mazaqqa ūşyramai, qoldau tapsa eken...
Är qazaqtyŋ oşaǧynyŋ oirany şyǧyp, ışınen ırıp jatqany – tarihynyŋ taptalyp, tılı men dınınıŋ, dästürı men saltynyŋ şöre-şöre bop qalǧanynyŋ saldary. Būǧan kım kınälı? Saitannyŋ azǧyrǧan tılıne ergen qazaqtardyŋ özı kınälı. Endı qaimana qazaq özın-özı jaudyŋ oǧyna bailap berıp, tübı qūridy. Nege? Nege? Öitkenı, qazaq jerdıŋ tūtastyǧynan da airylaiyn dep tūr. Qazaqtyŋ basyn qosyp, tūtastyryp ūstap tūrǧan Jer-Ana edı: endı ol da joq. Satylady. Mıne, mäŋgılık mekenıŋ – körıŋdı de satyp alasyŋ. Mendei sorly baiǧūstar Boraldaidyŋ borpyldaǧynda tynystaidy. Jä-ä, endı Alla ana düniede «kebınnen basqa äkelgen tügıŋ joq! Onyŋ özı kitaiskii! Sapasyz, deşevyi! Jer-Ananyŋ qoinyna qosa tapsyratyn altyn-kümısterıŋ, qymbat äşekeilerıŋ qaida? Solardy saǧan bermep pe edım...» dep, betıme salyq qylmasa bolǧany! Äŋkır-müŋkırge tezırek jetıp, äzıreiıl ükımdı tyŋdasam! Mynalar keşıktırdı ǧoi özı! Taŋerteŋ ölseŋ, tüske jetkızbei kömıp tastaityn ūiǧyrlar aqyldy eken. Mäŋgılık mekenge jyldam jetken, şynymen, jaqsy. Sarylyp tosqannan, arylyp kütkennen jaman ne bar?! Ömırımnıŋ kütumen ötıp ketkenın baiqamai da qaldym. Sovettıŋ balasymyn ǧoi, sendım, kommunizm keledı dedı. Küttım, küttım. Kelmedı, aqyry, joq bop şyqty. Endı qazaqtyŋ balasysyŋ dep, Egemen kelıp qūlaǧyma en saldy. «Jer de senıkı, tıl de senıkı, dıl men dın de senıkı, bärı-bärı senıkı! Jerdıŋ asty men üstındegınıŋ bärı – senderdıkı! Qaltaŋdy aqşaǧa toltyryp ap, taltaŋ-taltaŋ qaǧyp jüresıŋ» dedı. Ekı qolymdy qaltama salyp-ap, alaŋda taltaŋdap kele jatqam. Qai jüz gramm saitannyŋ türtkenın bılmeimın, Jer-Anamnyŋ betın myjǧylai taptap, qaptap jürgen orystar men qytailardy körgennen keiın jynym kelıp:
-«Äi, şäŋkıldekter! Äkelerıŋnıŋ üiınde jürgen joqsyŋdar! Jer de menıkı, tıl de menıkı, dın men dıl de menıkı! Ärı-berıden soŋ, tabandaryŋnyŋ astyndaǧy jūmyr tas ta menıŋ Jer-Anamdıkı! Menıkı, bärı, bärı menıkı! Esırmeŋder!» dep aiǧai saldym. Söitsem, maǧan tiesılı eşteŋe joq eken. «Menıŋ qatynym, menıŋ balam, menıŋ üiım, menıŋ tılım, menıŋ Jer-Anam» dep jürgenım – menıkı emes bop şyqty! Şap berıp ūstap alyp, türmege salyp qoiǧandar «osynyŋ bärı bıreudıkı» ekenın maǧan alty ai boiy tüsındırdı. Men «osynyŋ bärın maǧan Alla bergen! Menıŋ enşımdegı dünieler!» dep qarsylasyp baqtym! Endı Allanyŋ aldyna tezırek jetıp: «maǧan bergenderıŋ qaida? Senen de küştı bıreu tartyp alypty ǧoi!» dep, ökpemdı, renışımdı bıldıremekpın!
Mynalar şym batyp, joǧaldy ǧoi özderı! Allanyŋ aldyna tezırek aparmai ma? Işımdı kernep bara jatqan sözdı laq etkızıp töge salmaqpyn! «İä, bergenım – aqiqat! Ol senıkı edı, özıŋ airylyp qalsaŋ, endı kımdı kınälamaqsyŋ? Men bır bergenımdı ekınşı qaitara bıreudıŋ qolynan tartyp alyp bermeimın! Ebın keltır de, özıŋnıŋ qolyŋa özıŋ qaita tüsır...» dese, ne demekpın? Jä, ebın keltıretın amaldar qarastyraiyn, tabaiyn. Beker ölıppın. Ölmei tūra tūruym, qam-qareket qyluym kerek edı...
Jymyp basyp kırgen qatynymdy tanymai qaldym. Basyna qara oramal tartyp, qara köilek kiıp alǧan. Aqmolanyŋ äppaq ūnyndai jüzı quaryŋqyrai sūrlanyp, qaraqattai möldır qara közın qara köleŋke basypty. Äppaq qudai şaşyn jirenge boiap edı: bır talyn da qyltitpai, oramaldyŋ astyna jasyryp, tas-tüiın tartyp alypty. Belıne semser bailap, qolyna qalqan ūstatsa, jekpe-jekke şyǧatyndai şiryǧyp alǧanyn baiqadym. Adamdar kele jatqanyn estıgennen keiın maǧan naizaǧaidai jarq etıp bır qarady da, tairaŋ qaǧyp şyǧa jöneldı. Sol qarastan tūla boiymdy toq ūryp ötıp, aqpai qalǧan qanym kepken tamyrlarymdy kernep, zyrqyrap jöneldı. Naizaǧaidyŋ jarqyly ūşqyn tastap ketkendei... Osy ūşqyn menıŋ tänıme jan bıtıretındei! «Jūrttyŋ aldyna sol jarqyldy alyp bara ma eken?» dep oilap jatyrmyn. Şoşiyn dedım. «Osy men tırı siiaqtymyn ba, qalai? Qamalaǧan oi aram tänımdı alastap, özı nege qaşpaidy? Nege? Oidy qoişy... Özım be, älde, közım be, qatynymnyŋ ızın sanap, soŋynan ılesedı de jüredı. Mümkın, ölgen de şyǧarmyn. Ölgender barlyǧyn körıp, bılıp jatady degendı estıgenım bar. Osylai eken ǧoi. Qatyn, bala-şaǧaŋdy bıreu keskılep jatsa da, körgenıŋmen, ara tüse almaisyŋ. Küiınbeisıŋ de, süiınbeisıŋ de! Şarasyz küide baqyraiyp qaraisyŋ da jatasyŋ! Köresıŋ, könesıŋ... Qūdaidyŋ ıstep qoiǧanyn qaraşy! Älde, «tırıde jasaǧan künälaryŋnyŋ azabyn ölgende osylai tartasyŋ» degen emeurını me?
Molla bastaǧan top ün-tünsız kelıp, menıŋ basymda tūrdy. Işınde qatynym da bar. Qolynda büiırı būltiǧan äppaq hatqalta, betıne qarǧanyŋ qany jügırıptı. Şyraiy kırgen syŋaily. Äkım joq. Äkımdıktıŋ balansynda jaŋa aşylǧan zirat bar edı, sodan oryn bergen siiaqty. Asai-üseilerı de, qabyrşylary da daiyn. Är qabyrşynyŋ qolyna 2 myŋ teŋgeden ūstatsaŋ, kımdı bolsyn, tepkılep köme salady. Bılemın, özım de 2 myŋ teŋgege san märte jūmys ıstep, tamaqqa da, araqqa da lyqiia toiǧanmyn. Qolyŋa ūstap ketetınıŋ jäne bar. Marqūmnyŋ tuystary jomart bolsa, odan da köbırek alasyŋ. Al Keŋsaida mäiıttı kömbeidı, arulap jerleidı. Janazasy şala şyǧarylyp, kömıle salynatyny tömengı jaqta ǧoi... Tömende... tömende. Bärı tömende. Joǧarǧy jaq bölek...
Molla zuyldata arabşa bırdeŋe oqyp, ekı adamǧa jaǧymdy küşpen aştyrtyp, auzyma su tamyzdy. O Alla, ömır boiy sairap ötkenderdıŋ jaǧy tüsıp ketpesın dep, bailap qoiuşy edı. Menıkı qarysyp, sıresıp aşylmaidy. Älde, söilemei, ǧūmyry jazumen ǧana ötkenderdıŋ jaǧy qarysyp qala ma?! Sodan keiın terezesınıŋ şynylary alynǧan salqyn bölmege kırgızıp, şeşındırıp, balǧyn kök şöptıŋ üstıne tyr jalaŋaş jatqyzyp, üstıme äppaq jaima japty. Jambasyma kök maisa tigennen keiıngınıŋ bärı qara tünek... Şynymen, öldım ǧoi deimın nemese öltırse kerek.
Qanşa uaqyt ötkenı belgısız: büiırımnen bıreu türtıp qalǧannan keiın jan-jaǧyma bajailai qaradym. Menı qap-qaraŋǧy laqat kördıŋ ışınde äppaq kebınge orap, üş jerımnen buyp, oŋ qyryma aunatqyryŋqyrai jatqyzyp ketıptı. Öz mäiıtımdı özım anadai jerden baqylap qaraimyn. Būǧan endı ne bolady eken dep, jerdıŋ betınde kütıp daǧdylanǧan basym, jerdıŋ astynda, kördıŋ ışınde tosyp jatyrmyn. Ūşyp jürmın ǧoi deimın...
Äŋkır men müŋkır kebınımdı şeşıp, jürelep otyrǧyzyp qoidy da, menı sūraq-jauaptyŋ astyna aldy. Äŋkır-müŋkır eken deimın, bıraq, eşkımdı de, eşteŋenı de körgen joqpyn. Tılımdı källimaǧa keltırgennen keiın, şamam kelgenınşe, bılımım jetkenınşe, jauap berıp jatyrmyn. Ara-arasynda denemdı qara ter basyp, tamaǧym qūrǧap ketedı. Buyltyqtanǧan tılım keiın jiyrylyp, auzyma syimai, tamaǧyma keptelıp qaldy. Bır uaqytta äŋkır-müŋkırdıŋ bıreuı:
-Äi, mynau ölımge älı daiyn emes qoi. Qaryzy men bereşegın kenje ūly moinyna alyp qaldy. Tübı bır öteidı. Alaşaǧy köp. Alaşaǧyn artynda qalǧan ūrpaǧyna kım äperedı? Şyǧaryŋdar mūny jer betıne! Qaitsyn! Alla bergen alaşaǧyn özı qaitaryp alsyn özıne! «Alǧanyna ie bolsyn dep, Jer betıne jıberıp em, būl ne bıtırıp jürgen?! Tapsyrmamdy oryndatpai, mūny nemenege äkeldıŋder?!» dese, ne aitamyz?- dep şar ete qaldy.
-Allaǧa aparyŋdar! Aitarym bar!-dep, men de zarlanyp jatyrmyn.
-Alla senıŋ ne teŋıŋ? Aldymen, jerdegı şaruaŋdy tyndyr!
-Sonda, ne ısteimın?- deimın men künäsız qalyp tanytyp.
-Ūiqydan oianǧan siiaqtysyŋ. Bıraq, älı marǧau qalpyŋ. Endı sanaŋdy oiat. Ne ısteitınıŋdı sanaŋ özı sanap beredı. Allanyŋ aldyna bız emes, sanaŋnyŋ özı jetelep aparsyn!- dedı äŋkır me, müŋkır me, bıreuı.
Endı bır qarasam, eşkım joq. Jym-jyrt. Äŋkır de, müŋkır de bezıp ketken. Jalǧyzbyn. Menı jer betıne şyǧarudy ūmytsa kerek. Jazǧan basym «qaşan şyǧarady?» dep, taǧy da küttım, tostym. Menı mülde esterınen şyǧarǧan. Qanşa uayt ötkenı belgısız... Talyǧyp, tamaǧym keuıp, tılım qūrǧap bara jatqannan keiın:
-Şyǧaryŋdar menı jer betıne! Allaǧa menıŋ keregım joq! Su berıŋder!- dep, bar dauysymmen aiǧai saldym.
Qūrsauly qyşqaş mūrnymdy jūlyp alardai qatty qysyp, bosatty da, ekı betımnen alma kezek osyp-osyp jıberdı. Közımdı aştym. Qatynym tönıp tūr.
-Allaǧa keregıŋ joq eken. Endeşe, bızge de kerek emessıŋ! Ketem deseŋ, jolyŋ aşyq! Oraza kezınde ışkenge ana nemerelerıŋnen ūialmaimysyŋ?! «Äkem, nakones-to, auzyn bekıtıptı ǧoi, auyz aştyrtaiyn dep keldım» dep, ebın tauyp posttan ötıp, ülken ūlyŋ keldı. Balalaryŋ eşteŋe bılmeidı. Juynyp-şaiynyp, iısıŋdı ketır de, dastarhan basyna otyr! Ülken ūl oianatyn uaqyt bop qaldy,- dedı de, qatynym meŋ-zeŋ menı qolymnan jetektep, duşqa kırgızıp jıberdı.
Tılımdı jūtyp qoiǧandai, eşteŋe dei almadym. Mylqaumyn ǧoi, mylqaumyn. Älde, şynymen, sümelekpın be? Janymdy şuaqqa böler jyly söz aŋsap jürgen men sümıreiıp, sülkigen qalpy jyly su aǧyzdym. «Janyŋdy jylytar söz de, basqa dünie de ızdeme! Ol joq jerdıŋ betınde...» deidı qūdaidan bezgen beibaq bır ün...
Asqar SÄBİTOV, Almaty qalasy. 17.05.2020. Saǧat - 03.44.
