Túrkistan oblysy ákiminiń birinshi orynbasary dúnıeden ozdy

3402
Adyrna.kz Telegram

Qosman Qaıyrtaıuly Aıtmuhametovtyń 57 jasynda mezgilsiz qaıtys bolǵandyǵy týraly óz Facebook paraqshasynda óńir ákiminiń orynbasary Sáken Qalqamanov jazdy.

Túrkistan oblysy ákiminiń qoǵamdyq qabyldaýynyń Facebook paraqshasyna oblys ákimi Ómirzaq Shúkeev óziniń birinshi orynbasarynyń qazasy týraly júrek tebirenter jubatý sózin jazdy. 

«Bul qaraly habar men úshin óte aýyr boldy. Ózimniń áriptes baýyrym, birinshi orynbasarym Qosman Qaıyrtaıuly Aıtmuhambetovtiń qazasy týraly, sýyt habardy estgende tóbemnen jaı túskendeı kúıde bolǵanymdy jasyra almaımyn. Júrek qan jylap tur. Qazaqstan eline belgili azamat, qurmetti áriptesim Qosman Qaıyrtaıulynyń dúnıeden ótýin aýyr kúızelispen qabyldadym. Qımastyq sezimimdi jetkizý qıynǵa soǵýda... Sanaly ǵumyryn elimizdiń órkendeýine arnaǵan asyl azamat edi. Biz ekeýmiz sonaý el astanasy – Astanaǵa qazirgi Nur – Sultan qalasyna kóshken sátten bastap etene tanysyp, qala basshylyǵynda júrgen jyldary senimdi serikterimniń, adastyrmas aqyldastarymnyń biri bola bildi.

Memleket jáne qoǵam qaıratkeri, abzal azamat Qosman Aıtmuhambetov árbir istiń kózin taba biletin bilikti de talapshyl basshy edi. Túrkistan oblysy ákiminiń birinshi orynbasary kezinde Túrki áleminiń rýhanı astanasy – Túrkistannyń jańasha keıipke enýinn, Arys qalasyndaǵy jarylystan týyndaǵan tótenshe jaǵdaıdyń zardabyn joıýǵa atsalysyp, sondaǵy úılerdiń sońǵy shatyry jabylǵansha baryn salyp qurylystyń basynda júrdi. Maqtaaral aýdanyndaǵy sý tasqynynyń saldaryn joıý sharalaryna da ólsheýsiz úles qosqan Qosman Qaıyrtaıulynyń mezgilsiz ómirden ótý bárimizdiń de janymyzdy kúızeltip ketti.

Sanaly ǵumyryn ult qyzmetine, memleket isine arnaǵan azamattyń ómir joly, ónegesi keıingi urpaqqa óshpes úlgi bolyp qala bereri anyq.

«Jaqsynyń aty ólmeıdi» deıdi halqymyz. Memlekettik iste óz órnegi, qaıtalanbas qoltańbasy bar azamattyń ómirden ótýine baılanysty marqumnyń otbasyna, týǵan – týystaryna qaıǵylaryna ortaqtasyp, kóńil aıtamyn.Marqumnyń jatqan jeri jaıly, ımany salamat bolsyn. Asyl azamattyń beınesi jadymyzda uzaq saqtalady» - delingen oblys ákiminiń sózinde.

Pikirler