Nur-Sultanda jylytý maýsymyna daıyndyq júrgizilýde. Elorda ákimi Altaı Kólginov jylý berý maýsymy, kómir satý jáne gazdandyrý boıynsha birqatar tapsyrma berdi, dep habarlaıdy adyrna.kz qalalyq ákimdiktiń baspasóz qyzmetine silteme jasap.
Atalǵan habarlamada: «Birinshi. Áleýmettik nysandar men turǵyn úılerdi jylýǵa ýaqytynda qosý qajet. Qazirgi ýaqytta turǵyn úılerdiń daıyndyǵy – 97%, bilim berý nysandary – 99%, densaýlyq saqtaý – 100%, elektrmen jabdyqtaý jelileriniń daıyndyǵy – 82%. Barlyq kórsetkishterdi 100%-ǵa jetkizý kerek" delingen.
Sonymen qatar jańa nysandardy jylýǵa qosý kózderin anyqtaý, qýattylyqty tekserý qajet.
Ekinshi. Qalada kómir tasymaldaıtyn 7 kompanııa, túrli aýdandarda ornalasqan otyn satatyn 11 núkte bar. Kómirdiń ortasha baǵasy, jetkizý qyzmetin qospaǵanda, sortyna baılanysty 12 myń teńgeni quraıdy. Dúrligis týdyrýǵa, jasandy kómir tapshylyǵyna jol bermeý kerek, óıtkeni qoımalarda otyn qory jetkilikti.
Turǵyndar kómirdi aldyn-ala satyp alýy qajet. Otynnyń baǵasy men mólsheri týraly tolyǵyraq aqparatty 109 jedel jeli nómiri arqyly bilýge bolady.
Úshinshi. Turǵyn alaptardyń turǵyndaryna gazǵa qosylýǵa tehnıkalyq sharttar berýdi jalǵastyrý qajet.
Jeleznodorojnyı turǵyn alabynda 100%, Promyshlennyı men Kóktal-2-de 95%, Kóktal-1de – 80% gaz taratý jelileri tartyldy. Bul jumystar Ońtústik-Shyǵys, Agroqalashyq turǵyn alaptarynda da júrgizilýde. Aldaǵy jylý berý maýsymynda osy turǵyn alaptar, sondaı-aq Agroqalashyq túrǵyn alabynyń bir bóligi úılerin gazben jylytady. Turǵyn alapta úılerdi gazben jabdyqtaý jelilerine qosýdyń tegin tehnıkalyq sharttaryn alý úshin front-ofıster ashyldy. Sonymen qatar bıyl JEO-1 jáne JEO-2 qazandyqtarynyń bir bóligin gazǵa aýystyrýdy josparlap otyrmyz», – dedi elorda ákimi Altaı Kólginov.
Qysqy maýsymda orta eseppen 500 myń tonna kómir jumsalady, qazir qalaǵa jetkizilip jatqan kómir mólsheri bul normadan asyp túsedi. Erejege sáıkes, jylytý maýsymy bes táýlik boıy syrtqy aýanyń ortasha temperatýrasy +10 °S jáne odan tómen bolǵan kezde bastalady.
