Şymkent qalasynda memlekettık tıldıŋ märtebesın köteru maqsatynda «Sättı jarnama» aksiiasy ūiymdastyryldy. Aksiianyŋ negızgı maqsaty - qala aumaǧyndaǧy maŋdaişa jäne syrtqy körnekı jarnama mätınderın «Qazaqstan Respublikasyndaǧy tıl turaly», «Jarnama turaly» QR Zaŋdarynyŋ talaptaryna säikes retke keltıru.
Şymkent qalasynyŋ mädeniet, tılderdı damytu jäne arhivter basqarmasynyŋ ūiymdastyruymen ötken şaraǧa audan äkımdıkterınıŋ, säulet, qala qūrylysy jäne jer qatynastary basqarmasynyŋ, ışkı sauda jäne monitoringı bölımı, tılderdı oqytu-ädıstemelık ortalyǧynyŋ qyzmetkerlerı qatysty.
Aksiia barysynda Täuke han daŋǧyly, J. Aimauytov, Sairam, Elşıbek batyr, Ş. Ualihanov köşelerındegı jalpy 542 kommersiialyq nysan tekserıldı. Zaŋ talaptaryna qaişy ornalastyrǧan 80 jarnama boiynşa käsıpkerlerge tüsındıru jūmystary jürgızılıp, ädıstemelık kömek retınde kıtapşalar taratyldy.
Basqarma mamandarynyŋ aituynşa, biyl 9 aida 2 myŋǧa juyq kommersiialyq nysan tekserılıp, Zaŋ talaptaryna qaişy ornalastyrǧan 155 jarnama retke keltırılgen.
Şymkent qalasy äkımınıŋ baspasöz qyzmetı
