Elımızdıŋ är öŋırındegı mūǧalımderdıŋ jalaqysy soŋǧy uaqytta tūtas berılmei otyr. Būl turaly aqparatty özımız bıletın mūǧalımder de rastady. Sonymen qatar künı keşe Facebook äleumettık jelısındegı «Qazaqstan ūstazdary» tobynda da osy mäsele talqyǧa tüstı.
«Pedagogtardyŋ eŋbekaqysyn bölıp -jarmai tolyq alatyn kün qaşan tuady?Nesie üstınde otyrǧanymyzdy bılmeidı- au deimın?Osy toptyŋ Sūltan aǧai bastaǧan myqtylary ailyq jönınde ministrge hat joldaiyq. Nege bızder mestnyi biudjet,respubl.biudjet dep bas qatyruymyz kerek?Adal eŋbegımızdıŋ aqysy nege uaqytyly tölenbei otyr?Oqu jospary aldyn- ala bekıtıldı,biudjet aqşasy bölındı.Kım ,ne sebeptı ūstap otyr ailyqty?...Bölıp-jaryp alǧasyn da prihod- rasshod esepteuge de köŋılıŋ bolmaidy eken.Qylyşyn süirete qys kele jatyr,otyn-suymyz ben bala şaǧamyzdyŋ kiım- keşegı,küzgı jiyn-terınnıŋ önımderın jylda osy uaqytta alyp aluşy edık.Biyl bölınıp-bölınıp berılgen ailyqtan berekemız kırmei tūr....Älde ūstazdarda artyq aqşa,investisiia bar dep oilai ma eken ökımet?Bar aqşany ipotechnyi nesiege qūiyp,aş otyrmyz! Tura maǧanasynda «Aşpyz!» dep jazdy elımızdıŋ mūǧalımderı. Osy jazbanyŋ astyna qaldyrylǧan pıkırlerdı oqyp, būl problema bır ǧana öŋırde bolyp jatpaǧanyna közıŋız jetedı.
Taiauda ǧana redaksiiamyzǧa Pavlodar oblysy, Ekıbastūz qalasyndaǧy bırneşe mūǧalım habarlasyp, jalaqylarynyŋ jyrymdalyp, bölınıp tüsıp jatqanyn aityp şaǧymdanǧan edı. «Jazǧy eŋbek demalysymyzdyŋ aqşasy azaiyp tüskenımen qoimai, bırneşe bölınıp tüsıp äbden it bolǧanbyz. Endı mıne, tamyz, qyrküiek ailarynyŋ jalaqysyn da qolymyzǧa tūtas ala almai otyrmyz» deidı pavlodarlyq ūstazdar. Ökınışke qarai, atyn atamaudy ötıngen mūǧalımder kımnen kömek sūraryn bılmei otyrǧanyn da jasyrmaǧan.
Osy taqyrypqa bailanysty jazylǧan pıkırlerde Türkıstan oblysyndaǧy bırneşe mekteptıŋ ūstazdary bır jalaqysyn üşke bölıp alǧany aitylady. Däl sondai jaǧdai Qaraǧandy, Jambyl oblystarynda da jalǧasyp jatyr eken. Būl qalai?Älde koronavirustyŋ qazaqstandyq köleŋkesımen «küresemız» dep biudjettıŋ büiırı tesıldı me? Virustyŋ köleŋkesı dep beker aityp otyrǧanymyz joq. Eger şeneunıkter «ūmytyp» qalsa, eske salyp öteiık. Biylǧy biudjettıŋ basym bölıgı «kovidpen küreske» degen jeleumen jelge ūşyp jatqany ötırık emes. Al kovidpen qalai küreskenımızge osy jyldyŋ şılde aiynda közımız anyq jetken. Milliardtaǧan aqşa bölıngen būl kovidıŋız Qazaq dalasyna «arnaiy şaqyrtumen» şılde aiynda kelıp, jūrt qarapaiym ǧana aspirin tappai därıhana jaǧalap ketken edı. Mūny mūǧalımderdıŋ jalaqysy tıkelei biudjetten bölınetın qarajat bolǧandyqtan eske salyp otyrmyz. Biudjette aqşa joǧynan ūstazdarymyzdyŋ jalaqysy jyrymdalyp jatsa, sol biudjettıŋ aqşasy naqty nege jūmsalǧanyna bilıktegıler esep beruı kerek şyǧar, qalai oilaisyz?
Elımızdegı ärbır otbasynyŋ negızgı asyrauşysy būl künde därıger men mūǧalım ekenı şyndyq. Otbasylyq şyǧyndardyŋ eŋ köp bölıgın ūstaz ben därıgerdıŋ jalaqysy jabatyny taǧy da aqiqat. Al sol ūstazdardyŋ ailyǧy älgındei üşke bölınıp tölenıp jatsa, ne bolǧany? Qazaqstannyŋ özı ǧana emes, tūtas halqy da qaryzǧa belşesınen batpai ma, mynadai jaǧdaidan soŋ. Ai saiyn töleitın nesiesı, kommunaldy şyǧyndary ūstazdarǧa «jalaqyŋdy bölıp tüsırıptı, jaraidy, sen de qaryzyŋdy bölıp qaitar» dep jaǧdai jasai ma? Ärine, jasamaidy. Eşbır bank nesienı keşıktırıp tölegen klienttıŋ basynan sipai qoimaidy.
Ükımet pen Bılım jäne ǧylym ministrlıgı elımızdegı ūstazdardyŋ osynau janaiqaiyna qūlaq türedı dep senemız. Qylyşyn süiretıp qys kele jatyr. Otyny men suyn qamdaityn uaqytta ūstazdarymyz jyrymdalǧan jalaqysynyŋ tiynyn sanap, qinala bastady. Būl problemany şūǧyl rettep, jaǧdaidy uşyqtyrmaǧan abzal. Öitkenı mūǧalımder bas köterse, bilık köp balaly analardyŋ narazylyǧyna zar bolyp qalary beseneden belgılı.
Meruert HUSAİNOVA,
«Adyrna» ūlttyq portaly.
Foto aşyq derekközden alyndy.Ūqsas jaŋalyqtar
