Nūrsūltan Nazarbaev Türkıstan qalasynyŋ qūrylysyna bölıngen aqşanyŋ qalai jūmsalyp jatqanyn aitty, dep habarlaidy «Adyrna» ūlttyq portaly. Būl turaly ol «Qazaqstan» Ūlttyq Arnasyndaǧy "Türkıstan: köne men keleşek köpırı" derektı filmınde mälımdedı.
«Köpşılık «Aqşany qaida jıberıp jatyr?» dep jiı sūraidy. Astanany salǧanda da solai bolǧan. Bıraq qazır elordaǧa salynǧan bır teŋge üş teŋge bolyp qaityp jatyr. Sol siiaqty bırınşı kezeŋde Türkıstanǧa 350 milliard teŋge jūmsalady", - dedı QR Tūŋǧyş Prezidentı.Sondai-aq, Nazarbaev belgılengen 160 nysannyŋ teŋ jartysy salynyp bıtkenın atap öttı. Onyŋ aituynşa, qala qūrylysyna qajettı aqşanyŋ teŋ jartysyn jekemenşık kompaniialar qūiyp jatqan körınedı. Derektı film barysynda Elbasy astanany Türkıstan qalasyna auystyruǧa qatysty pıkırın de bıldıre kettı.
"Ondai äŋgımelerdıŋ negızı joq. Bız qazırgı astanamyzdy ärı qarai ūlǧaitamyz. Kezınde 200 myŋdai halqy bar būrynǧy Aqmola 1 mln 200 myŋ tūrǧyny bar alyp şahar boldy. Nūr-Sūltan degen atau aldy. Ony men ūsynbadym, bıraq qarsy da bolǧanym joq. Sebebı, astananyŋ ärbır tasy menıŋ nūsqauymmen, ärbır ǧimarat menıŋ qatysuymmen salyndy. Sondyqtan özımızdıŋ Nūr-Sūltan qalasyn damytamyz»,-dep jauap berdı ol.
«Adyrna» ūlttyq portaly
