Búgin syrshyl sulýlyqtyń, ulylyqtyń sımvolyna aınalǵan Farıza Ońǵarsynovanyń týǵan kúni. Qara qyldy qaq jaryp, ádildikti jaqtap ótken, poezııa padıshasy, halyqtyń aıaýly qyzy tiri bolǵanda 81 jasqa tolar edi. Qaısar qyz kishkentaıynan ádebıetke jaqyn bolyp, aqyndyq qasıetterin tanyta bastaǵan. Aqynnyń ádebıet dep atalatyn azaby kóp aýylǵa kelýine jaratylystyń ákeniń qany, ananyń sútimen bergen qasıeti.
Farıza bireý de bolsa, biregeı degen uǵymdy bildiredi. Onyń otty jyrlary ulttyń qýanyshy da, jubanyshy da bolǵan. Farızada óziniń talantyna laıyq tegeýrindi minez de boldy. Talaıdy opyndyrǵan da, biraq aqyndy bıik shyńǵa jetelegen de, dál osy minez bolatyn. Ol eń aldymen qalyń qazaq jurtyna shynshyl jýrnalıst retinde tanyldy. Odan soń birneshe gazetterdiń bas redaktory bolyp qyzmet atqardy, parlament májilisiniń depýtaty boldy.
Aqynnyń shyǵarmashylyǵyna tán basty qasıeti shyndyqty tý etetindiginde edi. Tek jaı jyrlaý emes, qazirgi zamana talabynyń bıik deńgeıine laıyqtap jyrlaý Farıza shyǵarmashylyǵynyń bir qyry boldy. Aqyn qyzdyń bala kezden sanasyna toqyp, qanyna sińip alǵan adaldyq, tazalyq, erekshe talǵamy men talaby, osylaı shyńdala berdi. Jalǵan sóılegen janǵa búıregi burylmaıtyn taǵy bir erge tán qaısar minezi bar-dy. Jyrlarynda halqynyń turmys-tirshiligi aıqyn beınelenip, oqyrman júregine birden jol tartty. 75 jasqa qaraǵan shaǵynda dúnıe salǵan kórnekti aqyn qazaq ádebıetin bıik deńgeıge kóterýge zor úles qosyp, jyr áleminde ózindik qoltańbasyn qaldyrdy. Aqynnyń ózi ómirden ozsa da, sózderi máńgi óshpes mura bolyp qalary anyq..
Aıaýlym TILEÝQABYL,
«Adyrna» ulttyq portaly
