– Şymkenttegı atşabardy qoǧam qairatkerı Asanbai Asqarov 1979 jyly ülken küreskerlıkpen salyp berdı. Al oǧan deiın būl jer qūrylysqa qajet tas pen qūm öndıretın karer bolatyn. Sol karerdıŋ üstıne siyr fermasy salynǧan. Keiınnen būl jer ippodromǧa ainaldyryldy.
Odan berı 41 jyl öttı. Äbden eskırdı.
Ūlttyq sportqa janaşyr körermen bäigenı köruge kelgende bır-bırınıŋ köleŋkesıne, panasyna tyǧylyp, äbırjıp otyryp köredı.
Jyl on ekı ai är mezgıldıŋ qolaisyz aua raiyna tötep beruıne tura keledı. Sonda bärınıŋ aitatyny «Şatyr joq pa? Qaşan salynady?» degen saual.
Äu basta karerdıŋ üstıne salynǧan atşabar bolǧandyqtan, qazırgı orny 8 metr tömende, jeldıŋ ötınen tömen jatyr. Al samal soqpai, aua almaspai tūrǧan soŋ, attar qinalady. Erterekte ippodromnyŋ ainalasy aşyq bolatyn.
Qazır «Nauryz» alaŋyndaǧy karuselden bastap, «Otau Group» qūrylys kompaniiasy salyp jatqan 4-5 tūrǧyn üi bar. Būl da atşabar aimaqqa samaldyŋ enuıne kedergı bolǧany şübäsız.
Būǧan deiın Ö.Şökeev Oŋtüstık Qazaqstan oblysynyŋ äkımı bop tūrǧan kezde Oŋtüstık Koreiadan onǧa juyq investor keldı. Solardyŋ bärı küngeidıŋ tabiǧaty, aua raiy jarys ötkızuge qolaily ekenıne kelıskenımen, segız metr tereŋdıktı körıp, raiynan qaityp, ketıp qalǧan.
Jasyratyny joq, eskı ippodromnyŋ qazırgı zamannyŋ talabyna sai qyzmet körsetuıne mümkındıgı joq. Onyŋ üstıne jarty beldeuıne etnoauyl salyndy. Tastan qalanyp, bögetter jasaldy. Januarlar jüretın jol qysqardy. Qazır jattyǧudy atşabardyŋ jarty alaŋynda jasap jürmız. Al būl attardyŋ psihikasyna äser etıp, mınezı özgerude. Joldaǧy kedergılerdıŋ kesırınen öz jolynan adasyp, jarty joldan şyǧyp ketıp jatady. Joldaǧy türlı kedergılerden mertıgıp, är jarys saiyn kemınde 4-5 attan airylamyz. Odan bölek, ipoterapiiany türlı aurulardyŋ emı retınde damytu üşın jaǧdai jetıspeidı. Qora-jailarymyz da tar.
Vengriiaǧa barǧan kezde ippodromǧa jergılıktı halyq toiǧa barǧandai kelıp, jarystaryn joǧarǧy deŋgeide ötkızgenın közımmen kördım. Qytaidaǧy qazaq ölkesındegı ortalyqtan 20 km jerge ornalasqan atşabary men atqorasyn körseŋız, janyŋyz jai tabady. Eŋ bastysy, körermenderdıŋ jaǧdaiy jasalǧan.
Al bızdegı eskı ippodrom Asqarovtyŋ közındei qymbat meken ekenıne eşkımnıŋ dauy joq, alaida, uaqyt öz būiryǧyn jürgızbei tūrmaidy.
Osy oraida «jylqylarǧa da, sportşylarǧa da, keluşı körermenderge de, ipoterapiiamen ainalysatyndarǧa da jaily zamanaui, keŋ ippodrom salynsa ǧoi» degen oi-maqsatymyzben bölısıp kele jatqanymyzǧa bırneşe jyldyŋ jüzı boldy. Osyny eskergen Şymkent qalasynyŋ äkımı M.Äitenov taiauda eskı ippodromdy Almaty ainalma jolynyŋ boiyndaǧy Bozaryq şaǧynaudanyna, şahardyŋ eŋ biık nüktelerınıŋ bırıne köşıru turaly aitty.
Jaŋa atşabar qyrdyŋ üstıne oryn tepse, atqūmar jandardyŋ bükıl jaǧdaiyn jasauǧa mümkındık tuar edı. Şymkenttıŋ kıreberıs qaqpasy retındegı nysan jan-jaqtan keletın sportşylardyŋ ornalasqanyna da yŋǧaily bolar edı. Biık döŋge salynatyn atşabardyŋ jalpy aumaǧy 47 gektar bolmaq.
Jaŋa ippodrom boiynşa bırneşe joba ūsynyluda. Eŋ bastysy, jaŋa joba qonaqjai oryn bolady. Mındettı türde qonaqüi salynady. Jan-jaqtan jarysqa qatysatyn sportşylardyŋ otbasymen kelıp, sol jerge qonyp, erteŋıne sportpen şūǧyldanuyna jaǧdai jasalady.
Mäselen, Nūr-Sūltan qalasynda sondai mümkındıkter bar.
Qazırgı ippodromǧa körermen 1,5 km jaiau jürıp barsa, jaŋa nūsqasynda joldyŋ boiynan kıredı de jabyq alaŋqaidyŋ ışınde rahattanyp otyryp tamaşalaityn bolady.
Ǧani AHMETBAEV (Ūlttyq sport türlerınen balalar men jasöspırımderdıŋ mamandandyrylǧan sport mektebınıŋ direktory)
Foto avtory: Ömır Şynybekūly
