Qyzylorda qalasy maŋyndaǧy Qyzyljarma kentınde köpbalaly otbasy tūryp jatqan üiden ört şyǧyp, bır bala köz jūmdy. Tört bala anasymen bırge auruhanaǧa jetkızıldı, dep habarlaidy “Adyrna” ūlttyq portaly Astana telearnasyna sılteme jasap.
Ört beisenbıge qaraǧan tünı şyqqan, ol uaqytta balalar ūiyqtap jatqan. Jeŋıl materialdardan salynǧan uaqytşa tūruǧa arnalǧan üi bırden janyp kettı.
Ört söndıruşıler qoŋyrau tüskennen keiın oqiǧa ornyna bırneşe minut ışınde jetıp, jarty saǧat ışınde örttı söndırdı. Alaida ol uaqytta 2020 jyly tuǧan bala tūnşyǧyp qalǧan. 28 jastaǧy äiel men tört bala aman qaldy. Äieldıŋ qoly qatty küiıp qalǧan, 8, 7, 5 jäne 2 jastaǧy tört balaǧa ekınşı därejelı küiık diagnozy qoiylǧan. Olardyŋ ömırıne qauıp tönıp tūrǧan joq.
"Astana" teleranasynyŋ habarlauynşa, balalardyŋ äkesı ıssaparda bolǧan. Otbasynyŋ körşılerı örttı baiqaǧan kezde anasy balalaryn tereze arqyly şyǧaryp jatqan. Alaida besınşı balasyna kömektese almaǧan. Sebebı alty ailyq säbi besıkte jatqan.
Otbasy uaqytşa tūruǧa arnalǧan üidı jaldap jürgen. Tanystarynyŋ aituynşa, bar tapqan-taianǧanyn päteraqysyna beredı.
"Zaŋ boiynşa bız olarǧa 6 aiǧa deiın üi jaldap beruge daiynbyz. Sonymen qatar üidı qalpyna keltıru maqsatynda qala mesenattarymen kelıssözder jürgızdık. Olar da kömektesuge daiyn. Sondai-aq qarjylyq, azyq-tülık sekıldı şaralardy qarastyramyz", - dedı Qyzylorda qalasy äkımınıŋ orynbasary Ermūrat Rahmatullaev.Qazaqstandyqtar būl jaǧdaiǧa bei-jai qaramai, ört kesırınen üi-jai, mülkınen aiyrylǧan otbasyǧa kömek retınde qarjy jinap jatyr.
Ūqsas jaŋalyqtar
