2016 jylǵy 15 jeltoqsan aıynan bastap Qazaqstan Respýblıkasy Ulttyq mýzeıinde Táýelsizdiktiń 25 jyldyǵy qarsańynda sýretshi, qolóner sheberi Aman Muqajanovtyń «Dala ańyzy» atty sándik-qoldanbaly óner týyndylary kórmesiniń ashylý saltanaty ótken bolatyn. Kórme 2017 jylǵy 30 qańtarǵa deıin jalǵasady.
Kórmede avtordyń 200-den astam qoldan jasalǵan buıymdary qoıylǵan. Olardyń qatarynda syrǵa, saqına, bilezik, tanamonshaq, alqa syndy áshekeıler bar. Kórmege áshekeı buıymdarmen qatar, sýretshiniń qarym-qabiletinen habar beretin sýret jáne grafıka, ınstolıaııa qatarly sándik qoldanbaly óner týyndylary qoıylǵan.
Aman Muqajanov 1987 jyly Almaty memlekettik teatr jáne kórkem sýret ınstıtýtynyń sándik-qoldanbaly óner fakýltetin támamdaǵan. Qazaqstan Respýblıkasy sýretshiler Odaǵynyń jáne dızaınerler Odaǵynyń múshesi. Kóptegen halyqaralyq, respýblıkalyq kórme jobalarynyń qatysýshysy. Halyqaralyq zergerlik óner kórmeleriniń qurmet gramotalary men baǵaly syılyqtaryn ıelengen. Avtorlyq kórmeniń ashylýynda QR Ulttyq mýzeıiniń dırektory Darhan Myńbaı:
«Kórkem dúnıe týdyrý úshin zergerdiń óziniń kókiregi kórkemdikke toly bolýy kerek. Kókirek kórkem bolǵan jerde ǵana adamnyń qolynan kórkem dúnıeler týady. Al Aman Muqajanovtyń keýdesine bul kórkemdik týǵan jeriniń sulýlyǵy arqyly qonǵan der edim. Jáne bul zerger týǵan jeriniń kórkemdigin álem estetıkasymen ushtastyra bilgen», - dep zergerdiń shyǵarmashylyq zerthanasyna toqtalyp ótti.
Saltanatty jıynda avtor Aman Muqajanov ta óz kórmesi jóninde: «Men óz ultymnyń, týǵan halqymnyń ónerine alǵysym sheksiz. Óıtkeni, osy ulttyń qolóneri, zergerlik óneri bolmasa, bul jerde men de, sizder de bolmas edińizder. Búgingi jáne bolashaq zergerlerimiz sol babalarymyzdyń ónerin osy kúnge ıkemdep, eskilik pen zamanaýılyqty ushtastyra bilýi kerek. Bul – babalar aldyndaǵy bizdiń basty mindetimiz, bolashaqqa degen basty maqsatymyz bolýy tıis» dedi.
Aman Muqajanovty tabıǵattyń ásemdigi men adam balasynyń boıyndaǵy qarapaıymdylyq sekildi qasıetter qyzyqtyrady. Avtor osynaý qyzyǵýshylyǵynyń arqasynda óziniń sheberligin shyńdap, sýret óneriniń jańa qyrlaryn izdeýde. Qazirgi tańda sýretshi sándik ónerde metaldy qoldanýdyń jáne óńdeýdiń jańa tehnologııalarymen jumys isteýde.
