Bıyl Almaty oblysynda «Bastaý Bıznes» oqytý jobasy aıasynda kásipkerlik negizderi boıynsha 3 myń adamdy oqytý josparlanýda. Birinshi lekti oqytý sáýirdiń 26-synan bastaldy. Bul týraly «JETISÝ MEDIA» aqparattyq alańynda ótken brıfıng barysynda oblystyq kásipkerler palatasynyń kásipkerlikti qarjylaı emes qoldaý kórsetý bóliminiń basshysy Sánııa Naýryzbaeva málimdedi.
Spıkerdiń aıtýynsha, nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy aıasynda júzege asyrylyp jatqan «Bastaý Bıznes» jobasy azamattardy kásipkerlik daǵdylarǵa úıretýge baǵyttalǵan. Ótken jyly joba boıynsha óńirdiń 3022 jumyssyz jáne isin jańa bastaǵan kásipkeri bıznestiń qyr-syryn úırenip, 2039 adam jalpy somasy 1,8 mlrd.teńge qarjylandyrýǵa qol jetkizdi.
– Oqytý 5 baǵyt boıynsha uıymdastyrylyp, osy jyldyń qyrkúıek aıyna deıin jalǵasady. Karantındik sharalarǵa baılanysty oqytý onlaın formatta júrgizilip, 21 kún ishinde ótkiziledi, – dedi Sánııa Naýryzbaeva.
Jobaǵa Halyqty jumyspen qamtý ortalyǵynda tirkelgen jumyssyzdar, sondaı-aq erekshe qajettilikteri bar adamdar, zeınetkerlikke jetpegen 50 jastan asqan adamdar, NEET sanatyndaǵy jastar, az qamtylǵan nemese kópbalaly otbasy músheleri, aýyl sharýashylyǵy kooperatıvteriniń músheleri, qonys aýdarýshylar men qandastar qatysa alady. Jazylý úshin úmitkerler turǵylyqty jeri boıynsha Halyqty jumyspen qamtý ortalyqtaryna júginý kerek. Keıin berilgen joldama boıynsha «Atameken» óńirlik palatasyna nemese onyń fılıalyna júginedi nemese atameken.co saıty arqyly tirkeledi. Ary qaraı «Atameken» qatysýshylar arasynda oqytý júrgizip, onyń qorytyndysy boıynsha sertıfıkat tapsyrady. Osy sertıfıkatpen joba túlegi 200 AEK kóleminde qaıtarymsyz grant nemese 6 paıyz jeńildetilgen nesıe alýǵa múmkindigi bolady.
Aıta keteıik, 2017-2020 jyldar aralyǵynda oblysta «Bastaý Bıznes» jobasy boıynsha 13 505 adam kásipkerlik negizderine oqyp, onyń ishinde 5 137 joba 74,2 mlrd.teńge somaǵa qarjylandyryldy. Oblystyń jumyspen qamtýdy úılestirý jáne áleýmettik baǵdarlamalar basqarmasynyń halyqty jumyspen qamtý bóliminiń basshysy Álııa Esimjanovanyń aıtýynsha, bıyl 49 979 jumys ornyn, onyń ishinde 26 258 turaqty jumys ornyn qurý josparlanǵan. Búginde 14 myńnan astam jumys orny ashylǵan, onyń ishinde 11,6 jumys orny memlekettik baǵdarlamalar aıasynda quryldy.
Aǵymdaǵy jyly «Eńbek» nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan memlekettik baǵdarlamasyn iske asyrý úshin 17,8 mlrd.teńge bólindi. Bul qarajat kásiptik oqytýǵa, shaǵyn nesıelendirýge, granttarǵa, áleýmettik jumys oryndaryn qurýǵa baǵyttalatyn bolady
