Belgisiz adamdar Tashkenttegi (Ózbekstan) qaıyrymdylyq qorabyna 50 myń dollar saldy. Bul aqsha aýyr naýqastardy emdeýge jumsalady, dep habarlaıdy "Adyrna" ulttyq portaly CentralAsia.media-ǵa silteme jasap.
Qorap Korzinka atty jeliniń sýpermarketteriniń birinde bolǵan degen aqparat bar. Belgisiz adamdar oǵan 50 myń dollar tastap ketken. Bul týraly jeli basshysy Zafar Hoshımov áleýmettik jelilerde habarlady.
«Búgin biz taǵy bir qaıyrymdylyq qorabyn ashyp, aqshany sanamaq bolǵanda qoraptan onnan astam aq konvert shyqty. Biz olardy ashqan kezde konvertterden jalpy quny 50 000 dollarlyq kýpıýralar tabyldy. Ramazan aıynda osyndaı shyn júrekten ıgi amal, naýqas balalarǵa keremet syılyq jasaǵan bizdiń jerlesimiz, osy berekeli aıdyń keremet qasıetterine degen senimimizdi kúsheıtti», delingen habarlamada.
Kásipkerdiń aıtýynsha, barlyq qarajat «Ezgý Amal» qaıyrymdylyq qorynyń shotyna aýdarylady. Bul qor onkologııalyq aýrýlary bar balalarǵa kómek kórsetýge mamandandyrylǵan.
"Adyrna" ulttyq portaly
