Qazaqtyŋ qas jauy, közıne qan tolǧan qanışer, genosid jasauşy jauyz Goloşekindı bılmeitın qazaq joq şyǧar. Filipp İsaevich Goloşekin 1876 jyly Vitebskıde ömırge kelgen edı. Ömırınıŋ san jylyn Reseidegı revoliusiialyq qozǧalystarǧa arnaǧan. Patşa äuletınıŋ atyluyna tıkelei qatysyp, äskeri şenge ie bolǧan.
1924-1933 jyldar aralyǧynda Qazaqstannyŋ Kompartiiasynyŋ bas hatşysy (bügıngı tılmen aitqanda prezidentı) qyzmetın atqarady. Osy jyldar aralyǧynda asa jauyzdyq pen qatygezdık saiasatyn ūstanǧan ol, ūjymdastyru saiasatyn küşpen jürgızdı. «Kışı qazan» ideiasyn ūsynyp, sol äreketın ıske asyru jolynda bailar men qarapaiym halyqty qanady. Ol "Qazaqstanda kommunistık jüienıŋ iısı de joq" dep eseptep, qaita töŋkerıs jasau kerek degen oida boldy.
1928 jyldan bastap ol saiasatyn qanmen asyra bastady. Qarsy şyqqandy atty, asty, türmege japty. Qazaqtyŋ saiasi elitasy men ziialylaryn qudalap, quǧyn-sürgın saiasatyn ıske asyrdy. A.Baitūrsynov, M.Dulatov, J.Aimauytov, M.Jūmabaev, S.Säduaqasov, S.Qojanov, J.Myŋbaev, N.Nūrmaqov jäne özge de ūlt ziialylyrynyŋ artyna şam alyp tüsıp, qudalady. 1931-1933 jyldar aralyǧynda elımızde Goloşekin saiasatynyŋ äserınen aşarşylyq ornap, Qazaq halqynyŋ 60 paiyzy nemese 3 mln halyq qyrylyp qaldy. Milliondaǧan halyq bosyp, Qytai men Özbekstan, Monǧoliia men Resei jäne özge de aimaqtarǧa qonys audardy. 1933 jyly Qazaqstandaǧy aştyqtyŋ deŋgeiı orasan zor jäne şyǧynynyŋ alpauyt boluyna bailanysty, ony ornynan alyp tastap, KSRO-nyŋ bas arbitrı qyzmetıne taǧaiyndady. 1933-1937 jyldary sol qyzmettı atqarǧan älgı Goloşekin qanışerdıŋ özı saiasi quǧyn-sürgınge ūşyrady. Söitıp ūltymyzdyŋ ūlandaryn jalmaǧan saiasattyŋ qūrbanyna özı ainaldy.
1939 jyly 15 qazanda «Halyq jauy» atanyp, tūtqyndaldy. Ol şyn mänınde jalǧyz ädılettı aiyptalǧan halyqtyŋ şynaiy jauy edı. Söitıp, 1941 jyly 28 qazanda Kuibyşevte atyldy. Solaişa körıŋde ökırgır jalmauyz ajal qūşty. Alaida qazaqty qyrǧan qanıpezerdı 1961 jyly KSRO aqtap şyqty.
"Adyrna" ūlttyq portaly
Ūqsas jaŋalyqtar
