Eshkimge táýelsiz, egemendi el bolǵanymyzǵa bıyl 30 jyl. 30 jyl – aıtýǵa ońaı bolǵanymen, tarıh úshin aýyz toltyryp aıtarlyqtaı ýaqyt. Osy jyldar aralyǵynda memleket tarıhynda eleýli ózgerister oryn aldy.
Qazaqstan – álem elderine óziniń derbes, dara memleket ekendigin dáleldeı aldy. Búginde elimiz shekarasy shegendelgen, baı salt-dástúri bar, mádenıeti ozyq, dini men tili, ulttyq qundylyqtary baı elder qatarynda.
Táýelsizdik – elimizdiń baǵa jetpes baılyǵy. Táýelsizdik – qasterli uǵymnyń biri. «Táýelsizdik – qaıta jańǵyrǵan qazaq memlekettiginiń, ata-babalarymyz ańsaǵan azattyqtyń tuǵyry nyǵaıa túskenin áıgileıtin mańyzdy beles. 30 jyl kóptegen halyqtar úshin qıyndyǵy men qýanyshy, daǵdarysy men damýy almasqan tutas dáýir deýge bolady. Sondaı-aq táýelsiz el bolý ony jarııalaýmen nemese memlekettiń irgetasyn qalaýmen shektelmeıdi. Táýelsizdik úshin naǵyz kúres kúndelikti eńbekpen, úzdiksiz ári dáıekti eldik saıasatpen máńgi jalǵasady. Biz qýatty táýelsiz memleketimizben ǵana ult retinde jer betinde saqtalamyz. Osy aınymas aqıqatty berik ustanýymyz qajet. «Táýelsizdik bárinen qymbat!» degen bir aýyz sóz máńgi uranymyz bolýǵa tıis»,-dep elimizdiń Prezıdenti Qasym-Jomart Toqaev «Táýelsizdik bárinen qymbat» atty maqalasynda aıtqan bolatyn. Aıtsa aıtqandaı, qazaq halqy osynaý ulan-baıtaq jerin eshkimnen qol jaıyp surap almady, eshkimnen tartyp ta alǵan joq, jalǵa da jalbarynyp ótinbedi. Táýelsizdik bizge babalardan qalǵan uly qundylyq. Osy qundylyqty babalarymyz aq bilektiń kúshimen, aq naızanyń ushymen sońǵy qasyq qany qalǵansha qorǵap qaldy. Urpaqqa amanat etti. Shyndyǵynda halyq danalyǵynda «Táýbeniń zory – táýelsizdik» degen qanatty sóz bar. Ata-babalarymyzdyń ańsaǵan armany – táýelsizdiktiń besiginde terbelip, erkin ómir súrip jatqan bizder shynaıy baqytty jandarmyz. Endigi maqsat - osy erkindikti, egemendikti baıandy etý jolynda aıanbaı ter tógip, jumyla eńbek etý.
Baǵdagúl Jalǵasbekova,
Sholaqaı aýyldyq kitaphanasynyń kitaphanashysy
