Kez-kelgen eldiń jylnamalyq tarıhynda tarıhı bastaý alǵan kezeńderi bolady. Biz úshin jańa dáýirdiń araıly tańy 1991 jyldyń 16 jeltoqsany. Bul – elimizdiń ulttyq tarıhyndaǵy aıyryqsha tarıhı kún. Táýelsizdik – ay termen kelgen tátti jeńis.
Táýelsizdik merekesi - memleketimiz ben halqymyz úshin eń basty ári qundy mereke. Bıyl rýhy asqaq, tuǵyry bıik táýelsiz memleketimizge 30 jyl tolýda. Qarapaıym qazaqtyń tilimen aıtqanda naǵyz erdiń jasynda, uly maqsattardyń basynda turmyz. Otyz jyl ishinde Qazaqstan ekonomıkalyq damýda, halyqtyń ál-aýqatyn qamtamasyz etýde asa zor jetistikterge qol jetkizdi. Turaqtylyq jáne qoǵamdaǵy ózara túsinistik, zor jaýapkershilikpen júzege asyrylǵan syrtqy saıasat – respýblıkanyń ǵalamdyq deńgeıde bedelin ósirdi.
Táýelsiz elimiz shırek ǵasyrǵa jýyq ýaqyt ishinde qarjy daǵdarysynyń qıyndyqtaryna qarsy turyp, turaqty damý jolyna tústi. Bıik belesterdi baǵyndyryp, tolaǵaı jetistikterge qol jetkizdi, álemdegi básekege qabiletti elderdiń qataryna endi.
Táýelsizdik – ol ulttyq mereke, onyń tamyry – jasampazdyq rýh, urany – el men halyq. Ómirsheńdik pen kemeldilik aıasynda ómir súrip, beıbitshilik, tatýlyq týyn bıikke kótergen Qazaqstan halqy jańa álemniń jańalyqtaryna umtyla bermek.
Ótkenimizge kóz salsaq súrleýi mol soqpaqtarmen, oı-shuńqyry, qaýip-qateri kóp kópirlerden de ótippiz. Azanymyz aqyryn, janazamyz jasyryn aıtylǵan kezder de jazylypty tarıh betinde. El táýelsizdigine qol jetip, bostandyqtyń boz tańy atqan sátte saǵyna qaýyshqanymyz – dinimiz ben dilimiz edi. Eńbektegen baladan eńkeıgen qarııalarǵa deıin el eńsesin kótergen bul kún barshamyzǵa baǵaly, mán-mazmuny tereń meıram. Keshegi qysyltaıań ýaqytqa, dil men dinniń dármensiz qalǵan kezeńine kóz salyp, búgingi shattyǵy mol shańyraqta erkin qulshylyq qylyp otyrǵan zamanǵa bir qaraǵan adam táýelsizdiktiń «Táńir bergen tátti syı» ekenin uǵynary ras.
Búgin biz keshegi tarıhtyń soqpaǵynan súrinse de, jyǵylmaǵan, dinin dástúrine aınaldyryp, senimin joǵaltpaǵan tekti eldiń tizginin ustap otyrmyz. Shapqan tulpardyń tuıaǵy tozatyn, ushqan qustyń qanaty talatyn ulan-ǵaıyr mekenniń muragerlerimiz. Sondyqtan da ǵasyrlar boıy armandaǵan táýelsizdiktiń qadir-qasıetin eń aldymen ózimiz uǵynyp, ony urpaqqa jetkizý – paryzymyz.
Elimizdiń eńsesin túsirmeı, ózge elmen teń ustap, qanshama ulttar men etnostardyń basyn qosyp, birligi jarasqan, uıymshyldyqqa uıyǵan memleket qurý, ony ustap otyrý ońaı is emes ekeni barshamyzǵa málim. Endeshe osy táýelsizdigimizdiń qadirin bilip, qasıetin uǵyndyrý úshin óskeleń urpaqqa nasıhattaı otyryp, keleshegimizdiń kemeldenýine, bolashaǵymyzdyń jarqyn bolýyna at salysaıyq!
Aınash Áldıbek,
«Talǵar»
