Qazaqtan şyqqan tūŋǧyş ǧaryşker Toqtar Äubäkırovtıŋ esımı tarihta qalatyny sözsız. Keŋes Odaǧynyŋ jäne Resei Federasiiasynyŋ batyry atanǧan, el maqtanyşy biyl 75 jasqa tolyp, mereilı mereitoiyn atap ötude. Ūly dalanyŋ ūşqyşy Toqtar Oŋǧarbaiūlynyŋ qūrmetıne orai bügın audanymyzǧa qarasty «GULNAR BAQ» demalys ornynda qūmdaǧy voleiboldan halyqaralyq jarys ūiymdastyrylyp, onyŋ aşylu saltanaty men alǧaşqy oiyndary ötkızıldı. Dübırlı dodanyŋ ötuıne Almaty oblysynyŋ äkımdıgı men «Burevestnik-Almaty» voleibol kluby ūiytqy boldy.
Sporttyq ıs-şaraǧa mereilı 75 jasqa jetken, Halyq qaharmany Toqtar Äubäkırov arnaiy şaqyrylsa, qūrmettı qonaqtardyŋ qatarynda Qazaqstannyŋ halyq jazuşysy, «Nevada-Semei» poligonyn jabu üşın küresken, qoǧam qairatkerı Oljas Süleimenov, belgılı küişı Seken Tūrysbekov, general-leitenant Amangeldı Şabdarbaev, Qarasai audanynyŋ äkımı Jandarbek Dalabaev jäne basqa da qoǧam qairatkerlerı boldy.
Halyqaralyq turnirdıŋ aşylu saltanatynda audan basşysy Jandarbek Ermekūly alǧaşqylardyŋ bırı bolyp söz bastap, qazaqtyŋ tūŋǧyş ǧaryşkerıne degen ızgı tılegın, ıltipatyn bıldırıp, osyndai aŋyz adamnyŋ qazaqtan şyqqanyna quanu kerektıgın aitty. Sonymen qatar, audan äkımı J.Dalabaev oblys basşysy Amandyq Batalovtyŋ arnaiy qūttyqtauyn jetkızıp, osyndai igı bastamaǧa sebepşı bolyp otyrǧan
«Burevestnik-Almaty» voleibol klubynyŋ prezidentı Amangeldı Şabdarbaevqa erekşe alǧysyn bıldırdı. Mereitoi iesıne degen ystyq yqylasyn, aq tılegın qūrmettı qonaqtardyŋ bırı Oljas Süleimenov te arnap, jarysqa qatysuşy komandalarǧa sättılık tıledı.Sporttyq bäseke bastalar aldynda būl turnirdıŋ basty keiıpkerı, ǧaryşker Toqtar Äubäkırov özı de bır-ekı auyz jyly lebızın bıldırdı. Ol öz sözınde osyndai basqosuǧa sebepker bolǧan A.Şabdarbaevqa degen şynaiy rizaşylyǧyn bıldırıp, dostyqtary qaşanda joǧary ekenın aityp, būl dodada jeŋılıs bolmaidy, tek sport qana jeŋetının erekşe köŋıl-küide jetkızdı. Al, öz kezegınde general-leitenant Amangeldı Smaǧūlūly halyqtyŋ maqtanyşy T.Äubäkırov jaily jaqsy estelıkterımen bölısıp, söz soŋynda qazaqtyŋ tūŋǧyş ǧaryşkerıne jäne basqa da bırqatar qadırlı qonaqtarǧa şapan jauyp, qūrmet körsettı.
Qūtty meimandardyŋ sportşylarǧa degen tılekterınen keiın, jarystyŋ alǧaşqy oiyndary da bastalyp kettı. Bügıngı oiynǧa 40-tan astam erler men äielder, sonymen qatar körşıles Özbekstan memleketınen bırneşe komanda qatysty. Olar jūp retınde jäne törtke tört bolyp, qarsylas retınde baqtaryn synaidy. Üş künge sozylatyn jarystyŋ jalpy jülde qory – 1 mln. teŋge.
Ūqsas jaŋalyqtar
