Aqtóbede 1414 biryńǵaı baılanys ortalyǵynan tólem taǵaıyndalǵany týraly habarlama alǵan zeınetker 33 teńge tólem alatyn boldy dep habarlaıdy "Adyrna" ulttyq portalynyń tilshisi.
Nellı esimdi zeınetkerge 1414 biryńǵaı baılanys nómiri arqyly halyqqa qyzmet kórsetý ortalyǵynan ózine tólem taǵaıyndalǵany týraly sms kelgen. Keıin ol halyqqa qyzmet kórsetý ortalyǵyna barǵan kezinde álgi tólem mólsheri nebári 33 teńge turatynyn bilgen.
"Men Túrgenev boıynda ornalasqan halyqqa qyzmet kórsetý ortalyǵyna bardym. Ol jerde maǵan bankke baryp, shot nómirin alýdy ótindi. Bankke baryp qaıta keldim. Alaıda birde-bir qyzmetker budan ári ne isteý kerektigin túsindire almady. Kelesi kúni kelińiz dedi. Kelesi kúni bardym. Bir terezeden ekinshi terezege júgirtti. 2-qabattaǵy №9-kabınetke jiberdi. Ótinish toltyrǵannan keıin maǵan taǵaıyndalǵan tólem 33 teńgeni quraıtynyn aıtty. Men ne jylarymdy ne kúlerimdi bilmedim. Eki kúnde jolyma 1000 teńgeden astam aqsha jumsadym. Bul ne mazaq? Onyń ústine 33 teńgeni tek shilde aıynda ǵana alamyn", - deıdi zeınetker.
Halyqqa qyzmet kórsetý ortalyǵy mundaı tólem BJZQ arqyly júzege asyrylatynyn, zeınetkerge 33,19 teńge taǵaıyndalǵanyn jetkizdi.
"Adyrna" ulttyq portaly.
