Oblys äkımı Mahambet Dosmūhambetovtıŋ töraǧalyǧymen jiyn ötkızılıp, öŋırdegı halyq sanaǧyna qatysty jūmystar pysyqtaldy.
Biylǧy ūlttyq sanaǧy aǧymdaǧy jyldyŋ 1 qyrküiegı men 15 qazan aralyǧynda internet jelısı arqyly onlain rejimde jäne 1-30 qazanda planşetterdı qoldana otyryp, aralau arqyly ötkızu josparlanuda. Qazırgı taŋda būl jūmystar aiasynda oblysta arnaiy komissiia qūrylyp, bekıtılgen josparǧa säikes tiıstı jūmystar ūiymdastyryluda.
QR Strategiialyq josparlau jäne reformalar agenttıgı Ūlttyq statistika biurosynyŋ Atyrau oblysy boiynşa departamentınıŋ basşysy Galia Mūhanǧalievanyŋ sözınşe, halyq sanaǧynyŋ daiyndyq kezeŋı osy jyldyŋ 1-30 mausym aralyǧynda ötkızılgen. Būl jūmysqa oblys boiynşa barlyǧy 170 adam tartylǧan. Olar tūrǧyn üilerdıŋ, ǧimarattar men tūrǧyn emes üi-jailardyŋ tızımın jasaqtap, tūrǧyndardyŋ sanyn naqtylaǧan.«Ūlttyq statistika biurosynyŋ «Audandastyru» avtomattandyrylǧan jūmys orny aqparattyq jüiesıne oblys boiynşa 176 389 obekt engızılgen bolatyn. Aralau jūmystary qorytyndysynda oblys boiynşa 175 641 obekt anyqtaldy nemese josparly obektılerdıŋ 99,6%-y qamtyldy. Qate obektılerdıŋ sany 2 178 bırlıktı qūrady.
Atyrau oblysy boiynşa 149 negızgı tırkeu uchaskelerınen bölek arnaiy ūiymdarda barlyǧy 139 obekt qalyptastyryldy. Olarda tūraqty tūratyndardyŋ sany 2 877 adamdy jäne 11 369 bırlık tösek-oryndy qūrady»,-dedı ol. Osylaişa anyqtalǧan obektılerdegı tūrǧyndardyŋ sany arnaiy ūiymdarda tūraqty tūratyndardyŋ sanyn qosa 664 493 adamdy qamtyp otyr.Departament basşysy daiyndyq kezeŋın ötkızu kezınde tuyndaǧan problemalyq mäselelerdı de atap öttı. Iаǧni, sanaq personalynyŋ jauapsyzdyǧy men nemqūrailyǧy, köşe ataulary men üi nömırlerı ılıngen anşlagtardyŋ joqtyǧy qiyndyq tuǧyzǧan. Sondai-aq, Atyrau oblysynyŋ säulet jäne qala qūrylysy basqarmasymen ūsynylǧan oblystyŋ eldı mekenderınıŋ shemalyq kartalarynda keibır obektılerdıŋ belgılenbeuı, köptegen üi şaruaşylyqtarynyŋ sanaqtan beihabar bolulary da jūmysqa kerı äserın tigızgen.
Sonymen qatar, Galia Mūhanǧalieva Ūlttyq halyq sanaǧynyŋ negızgı kezeŋınde Atyrau oblysy boiynşa 913 adam uaqytşa jūmysqa tartylatynyn, onyŋ ışınde 114 nūsqauşy-baqylauşy jäne 799 interviuer bolatynyn mälımdedı. Olarǧa qoiylatyn talaptar: QR azamaty boluy, jasy 18-ge toluy, kompiuterde jūmys ısteu qabıletı, kandidattar vaksinasiialaudan ötken boluy kerek. Käsıbi bılımı men jūmys ötılı boiynşa talaptar qoiylmaidy.Jiynda oblys äkımı Mahambet Dosmūhambetov atalǧan kemşılıkterdı joiyp, qala, audan äkımderıne halyq sanaǧyna qoldau bıldıru qajettıgın basa tapsyrdy. Sondai-aq, öŋır basşysy interviuerlerdı vaksinasiialaudan ötkızudı, äleumettık jelıler men būqaralyq aqparat qūraldarynda tüsındırme materialdaryn ornalastyrudy tapsyrdy. Sonymen qatar, mamandardyŋ qauıpsızdıgın qamtamasyz etu üşın qajettılık tuyndaǧan jaǧdaida uchaskelık polisiia qyzmetkerlerınıŋ bırlesıp aralauyn ūiymdastyrudy, sanaq personaldaryn qajettı orynjailarmen, qūral-jabdyqtarmen qamtamasyz etudı mındettedı. Oǧan qosa, nūsqauşy - baqylauşylarmen mamandardyŋ qoǧamdyq kölıkterınde tegın jüruın ūiymdastyrudy tapsyrdy. Aita ketu kerek, «2020 jyly Qazaqstan Respublikasy halqynyŋ ūlttyq sanaǧyn ötkızu turaly» Qazaqstan Respublikasy Ükımetınıŋ №419 qaulysy qabyldanyp, alaida, eldegı pandemiiaǧa bailanysty Ūlttyq sanaqty ötkızu osy jylǧa auystyrylǧan bolatyn.
