Qazaqstannyŋ reseilık Sbermen kelısımı qoǧamda ülken dau tuyndatuda. Ükımetke qarapaiym halyq ta, partiia ökılderı de türlı saualdar joldauda. QR Premer-Ministrı A.Ū. Maminge Mäjılıstegı “Aq jol” demokratiialyq partiiasy fraksiiasy atynan Mäjılıs deputaty Maqsat Ramanqūlov Resei Sberbankımen sifrlyq ükımet platformasyn qūru turaly kelısımı jönınde deputattyq saual joldady. Atalmyş saualdy özgertpesten nazarlaryŋyzǧa ūsynamyz.
QR Premer-Ministrı
A.Ū.Maminge
Qūrmettı Asqar Ūzaqpaiūly!
Qazaqstan Ükımetınıŋ Resei Sberbankımen sifrlyq ükımet platformasyn qūru turaly kelısımı qoǧamda ülken dau tudyrdy.
«Aq jol» demokratiialyq partiiasynyŋ fraksiiasy ötken jyldary jekelegen ministrlıkterdıŋ, jalpy alǧanda sifrlyq damu mäselesınıŋ aqparattyq jüieler jūmysyndaǧy sätsızdıkterın bırneşe ret synǧa alǧan edı.
Qoldanystaǧy platformalardyŋ qabıletsızdıgı äsırese ötken jyldyŋ köktemınde pandemiia bastalǧan soŋ densaulyq saqtau, äleumettık qamsyzdandyru, bılım beru, salyq salu, auyl şaruaşylyǧy jäne basqa da köptegen elektrondyq qyzmetterdıŋ kemşılıkterı aiqyn boldy.
Sol kezdıŋ özınde memlekettıŋ jyldar boiy sifrlandyruǧa bölıngen milliardtaǧan qarjynyŋ tiımsız paidalanyluy anyqtaldy.
Memlekettık organdar men jauapty tūlǧalardyŋ jaǧdaidy tüzetu boiynşa jasaǧan äreketterı tiıstı nätije bermedı. Tıptı, platformalardyŋ odan ärı alystauyna, ony azamattar men biznestıŋ paidalanuynyŋ kürdelenuıne alyp keldı.
Al qazırgı zamanaui tehnologiialar men jaŋa älemdık jaǧdailardy eskere otyryp, Qazaqstan üşın memlekettık qyzmetterdı sifrlyq damytuda artta qalu problemasy jyl ötken saiyn ötkır bolyp tūr. Sondyqtan barlyq memlekettık organdardyŋ IT-jüielerın bıryŋǧai platformaǧa keltıru, zamanǧa sai jaŋǧyrtu qajettıgı şynymen de jüielı problemaǧa ainaldy.
Degenmen, bırqatar mäseleler aşyq küiınde qalyp otyr.
1) Bırınşıden. Atalǧan kelısımdı ötken jyldary sifrlandyru baǧdarlamalaryna biudjetten bölıngen qarjynyŋ tiımsız jūmsalǧanyn moiyndau dep baǧalauǧa bola ma?
Eger solai bolsa, onda ötken jyldary memlekettıŋ naqty qanşa qarjysy memlekettık qyzmet körsetudı sifrlandyruǧa jūmsaldy jäne onyŋ tiımsız jūmsalǧany üşın jauapkerşılık kımnıŋ moinynda?
2) Ekınşıden. Osy Kelısımdı daiyndau kezınde otandyq nemese eŋ myqty halyqaralyq IT-kompaniialardyŋ mümkındıkterı eskerıldı me? Ony daiyndau barysy aşyqtyq pen adal bäsekelestıkke qanşalyqty sai boldy?
3) Üşınşıden. Kelısımdı ıske asyru barysynda aqparattyq qauıpsızdık müddelerı qalai qorǧalady?
Osyǧan bailanysty būqaralyq baspasözde jariialanǧan sifrlyq damu jäne aeroǧaryş önerkäsıbı ministrınıŋ tüsındırmelerı jūrtşylyqty qanaǧattandyrmaidy, kerısınşe odan da köp sūraqtar tuyndatady. Onyŋ sebebı serverlerdı Qazaqstanda ornalastyruda ǧana emes, olarda saqtalatyn aqparatqa böten tūlǧalardyŋ qoljetımdılıgın şekteudıŋ tehnologiialyq mümkındıgı bar ma degen mäsele.
Jiyrma bırınşı aqparat ǧasyrynda IT qauıpsızdıgı bızdıŋ elımızdıŋ Täuelsızdıgınıŋ maŋyzdy faktory dep sanaimyz.
Jauaptardy zaŋda belgılengen merzımde berulerıŋızdı sūraimyz.
Qūrmetpen, «Aq jol» fraksiiasynyŋ deputattary
"Adyrna" ūlttyq portaly
