Auyr atlet Albert Linderdıŋ ölımınen soŋ Jazira Japparqūl, Karina Goricheva, Semen Linder bastaǧan basqa atletter "qūramadaǧy bapkerler qol köteredı, tapqan jalaqymyzdan jyryp alady, bopsalaidy, aqşa bermesek doping tabamyz dep qorqytady" dep mälımdedı. Būl şu basy doping dauynan arylmaǧan auyr atletikaǧa älı reforma jasalmaǧanyn körsettı. "Jülde alǧanda bapkerlerge kereksıŋ, basqa kezde senı laqtyra salady" deidı atletter.
Olar 1994-2016 jyldary qūramanyŋ bas bapkerı bolǧan, bas bapkerlıkten ketse de de-fakto ornyn saqtap qalǧan Aleksei Ni men qūramanyŋ aǧa bapkerı Sergei Sedovty aiyptaidy. Rioda qola alǧan Goricheva Sedovtyŋ qol kötergenın jylap otyryp aitty. Balalar qūramadaǧy orny üşın osyǧan deiın auyzdaryn jauyp keldık dep otyr.
"Qūramadaǧy auyr atletterdıŋ köbı tūrmysy tömen otbasynan şyqqan. Bız alyp jürgen ailyǧymyzdan aiyrylyp qalamyz ba dep qorqyp jürdık" - deidı Nadejda Nogai.
Bır sportşynyŋ ölımı auyr atletika jüiesındegı bylyqty taǧy da aşyp bergendei. Qazaqstan auyr atletikasynda sportşy karerasyn aiaqtaǧan soŋ bapkerlıkke auysuǧa mümkındık joq. Es bılgelı ştanga zalynan şyqpaǧan sportşy ömırden özın tappai qinalady. Qoldauşysy az sportşy psihologqa barudy da özı oilamasa kerek.
Qazaq qyzdary arasynan olimpiada jüldesın alǧan Jazira Japparqūl qazır qaida? Afinada kümıs alǧan auyr atlet Sergei Filimonovtyŋ STO-da jūmys ıstep jürgenı belgılı bolǧan. Aziia chempiony Tatiana Hromova da sporttan ketken soŋ eşkımge kerek bolmai qalǧan. Alber Linder de qūrylys pen STO jaǧalady. Auyr atletikada jülde alsaŋ kereksıŋ, basqa uaqytta eşkım senı kerek qylmaidy. İlia İlin ǧana qazır memlekettık qyzmette jür. Ol İlinnıŋ pysyqtyǧy şyǧar. Iа bır jerden özıŋdı tabu üşın olimpiadada ekı altyn alyp, artynan dopingpen ūstalyp ony qaitaryp beru kereksıŋ.
Ruslan MEDELBEK,
"Adyrna" ūlttyq portaly.
Ūqsas jaŋalyqtar
