Franııada dinı qyzmetkerlerdiń jantúrshigerlik qylmystaryn áshkere qylǵan baıandama jarııalandy. Oǵan sáıkes júzdegen zorlaýshy anyqtalyp, ondaǵan myń qurban týraly aqparat shyqty, dep habarlaıdy "Adyrna" ulttyq portaly.
RIA Novostı habarlaýynsha, jaqynda Franııada arnaıy baspasóz máslıhaty ótken. Onda 1950 jyldan beri 216 myń balanyń zorlyq-zombylyq qurbany bolǵany aıtyldy.
Sondaı qorlyqty kórgenderdiń biri Lıon qalasynyń týmasy Krıstıan Dıýbraı jýrnalısterge ólgisi kelgenin aıtqan. Onyń aıtýynsha, ol 11 jasta bolǵanda onyń otbasymen dinı qyzmetker dos bolǵan. Qyzmetker ár beısenbi saıyn balaǵa sabaq berýge úıine kelip otyrǵan. Alaıda serýen kezinde Krıstıanǵa tıisip, ata-anasy ekinshi qabatta bolǵanda úıde zorlaýǵa tyrysqan.
Krıstıan óziniń bul oqıǵasyn 2020 jyly ǵana aıtqan. Al oǵan tıisken adam eldegi shirkeý qyzmetinde júrgen 3 myń pedofıldiń biri bolyp shyqty.
Arnaıy komıssııa sońǵy 70 jyl ishinde shirkeýde jumys istegen 115 myń dinı qyzmetkerdiń úsh paıyzdan astamy pedofılııaǵa qatysy bar ekenin anyqtaǵan. Tergeýshilerdiń pikirinshe, bul sandar ádeıi tómendetilip kórsetilgen.
Franııa zańdary boıynsha merzimi ótken bul istermen endi Vatıkan aınalysady. Eger pedofılııaǵa jáne olardyń qylmysyn jasyrynýǵa qatysy bar adamdardyń kinási dáleldense, onda júzdegen dinı qyzmetkerler óz ataq-dárejesinen aıyrylady. Jábirlenýshilerge birneshe mıllıon AQSh dollary kóleminde ótemaqy tólenedi.
"Adyrna" ulttyq portaly
