Bıyl Shymkentte el Táýelsizdiginiń 30 jyldyǵyna oraı úsh mektep paıdalanýǵa berildi. Investorlar esebinen salynǵan qos bilim uıasy oqýshylar úshin jańa oqý jylynda esigin aıqara ashqan bolatyn. Búginde bul mektepterde myńdaǵan oqýshy bilim alýda.
Jańa bilim ordalarynda bári zamanaýı talapqa saı, oqýshylardyń bilim alýy úshin barlyq jaǵdaı jasalǵan.
Saıram eldi mekeninde ornalasqan bul Iasaýı atyndaǵy jalpy bilim berý mektebiniń qurylysy 2019 jyly bastalǵan. Áýelde bul jer qaraýsyz qalǵan nysan bolypty. Investor esebinen salynǵan mektep jańa oqý jylynda 2 aýysym boıynsha 1000-ǵa jýyq oqýshyny qabyldady. Kez kelgen synyby ár pánge laıyqtalyp, jańa dızaında sándelip, tehnıkamen jabdyqtalǵan.
Al qaladaǵy Nızamhan Sýlaımanov mektebiniń syrtqy kórinisi elordadaǵy Aq Ordany kóz aldyńa elestetedi. Dálizdiń kire-berisinen edenderge ár túrli tanymdyq, bilimpazdardyń kókjıegin keńeıtetin sýretter beınelengen. Eki myńǵa jýyq oqýshy bilim alatyn bul bilim ordasynda jalpy 100-den astam kabınet bar bolsa, onyń alpysynda ınteraktıvti taqta qoıylǵan.
Iýlııa Sergeeva, Nızamhan Sýlaımanov orta mektebiniń dırektory: "Bizge balalar qalanyń barlyq aýmaǵynan keledi. Qazirgi tańda oqýshylardy jańa oqý jylyna qabyldaýǵa daıyndyq júrip jatyr. Kadr máselesi boıynsha muǵalimder iriktelýde. Mekteptiń aýqymy keń, barlyq jeri jaryq, jylýmen qamtamasyz etilgen. Oqýshylardyń bilim alýy úshin barlyq jaǵdaı jasalǵan».
Balalaryn osynda bergen ata-analar tańdanasyn jasyrmaıdy. Mektep tolyqtaı zamanaýı úlgide salynǵanyn alǵa tartyp, onyń oqýshylar úshin oń áser bergenin aıtady.
Galına Gadjıkýlıeva, Shymkent qalasynyń turǵyny: «Balamdy bul mektepke berýimniń sebebi eń aldymen bizge jaqyn ornalasqan. Aldyn Bolashaq mektebine qatynaýshy edim. Bul mektep ádemi, záýlim etip salynǵan. Ár synypta kompıýter, ınteraktıvti taqta bar. Bul bizdiń balalarymyz úshin oń áserin beredi dep senemin. Mekteptiń ishin tolyqtaı aralap shyqtym. Maǵan bári unady».
El ıgiligi úshin ınvestorlar esebinen salynǵan bul 2 mektep jańa oqý jylynda paıdalanýǵa berildi. Al Qursaı shaǵyn aýdanyndaǵy 500 oryndyq bilim ordasy jýyrda qarasha aıynda ashyldy.
Aıta keteıik, bul mektepterdiń barlyǵy jan basyna qarjylandyrý baǵdarlamasy boıynsha jumys isteıdi. Iaǵnı, balalardyń bilim alýy úshin memleket esebinen qarjy bólinip otyrady.
