Bıyl jazda jańa baspana alǵan Rıdderdegi órtten zardap shekken turǵyndar berilgen úılerdiń jaǵdaıyna shaǵymdanýda, dep habarlaıdy "Adyrna" ulttyq portaly "BaigeNews.kz-ke" silteme jasap.
— Kúzdiń sońy bárimizge tóbeden aqqan sý túrinde úlken "tosyn syı" ákeldi. Jıhazdar, turmystyq tehnıka jáne jeke zattar búlindi. Osylaısha ómir súrip jatyrmyz. Al joldardy tazalaı ma, ol da úlken másele. Avtobýs júrmeıdi, adamdar qalaǵa qardy keship jaıaý barýǵa májbúr, - deıdi Marına Borısıýk.
Mamyr aıyndaǵy órtten keıin rekordtyq merzimde salynǵan jańa aýdannyń turǵyndary ortaq chatta óz túıtkilderimen bólisken: "Qazir bárimizde de osy másele. Shatyrdan qardy kúrekpen tazalaımyz, qurylysshylar barlyq materıaldy qurtty, úıdi eshkim qabyldap alǵan joq, komıssııa kelmedi. Mine, nátıjesinde bizdiń qanshalyqty "baqytty" kúı keship jatqanymyzdy búkil el biledi. Elektr symdary sýlanyp tur, bolashaqta taǵy da órt bolmasyna kim kepil beredi?".
Eske salaıyq, 2021 jyldyń 10 mamyrynda Rıdder orman sharýashylyǵy kásipornynyń aýmaǵynda ornalasqan aýylǵa bolǵan órttiń saldarynan bir adam qaza taýyp, taǵy eki adam aýyr kúıikpen aýrýhanaǵa jetkizilgen bolatyn. Órt birneshe ondaǵan úıdi qıratyp, kóptegen otbasy baspanasyz qaldy.
Shyǵys Qazaqstan oblysynyń ákimi Danıal Ahmetov barlyq órtten zardap shekkenderdiń baspana máselesin sheshýge, sondaı-aq olarǵa ótemaqy tóleýge ýáde berdi. Úsh aıdyń ishinde baspanasynan aıyrylǵan 32 otbasy túgeldeı baspanaly bolyp, qalashyq boı kóterdi.
Rıdderlikter jańa úılerge shilde aıynyń aıaǵynan bastap qonystana bastady, al sońǵy páter ıeleri tamyz aıynyń ortasynda kiltterin aldy. Órtten zardap shekkenderdiń barlyǵy kórsetilgen kómekke rıza bolǵanymen, olardyń kópshiligi birqatar sebepterge baılanysty narazy boldy: keıbir úılerde jeldetkish joq, elektr jaryǵy sónip qala beredi, sonymen qatar sýmen qamtamasyz etýde birqatar qıyndyqtar bar.
"Adyrna" ulttyq portaly
